دارىگەرلەر ەكى اپتا بويى نارەستەنىڭ ءومىرى ءۇشىن كۇرەستى
بالالارعا شۇعىل مەديسينالىق كومەك كورسەتۋ ورتالىعىنىڭ دارىگەرلەرى جاڭا تۋعان نارەستەگە كۇردەلى وپەراسيا جاسادى. وڭ جاق قولتىعىنداعى تۋابىتكەن ىسىكتى الىپ تاستادى، دەپ حابارلايدى Almaty-akshamy.kz.
الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، بالا دۇنيەگە مەرزىمىنەن بۇرىن كەلگەن.
تۋابىتكەن ىسىك وڭ جاق قولتىق استى ايماقتا پايدا بولدى.
دارىگەرلەر تىنىس الۋ جانە جۇرەك-قان تامىرلارى جەتكىلىكسىزدىگى، I دارەجەلى قان اينالىمىنىڭ بۇزىلۋى دياگنوزىن قويدى.
اعزا جۇيەلەرىنىڭ قالىپتى جۇمىس ىستەۋىنە لينفانگيوما كەدەرگى كەلتىردى.
تۋعان كەزدە بالانىڭ جاعدايى وتە اۋىر دەپ باعالاندى، نەوناتالدىق بريگادانىڭ كومەگىمەن پەرزەنتحانادان الماتى قالاسىنداعى بالالار شۇعىل مەديسينالىق كومەك ورتالىعىنا جەتكىزىلدى.
دارىگەرلەر ەكى اپتا بويى نارەستەنىڭ ءومىرى ءۇشىن كۇرەستى.
«دياگنوز - وڭ جاقتاعى قولتىق استى ايماعىنىڭ ۇلكەن ليمفانگيوماسى، كولەمى 12 دە 17 سم. مەرزىمىنەن بۇرىن، 34ء-شى اپتادا تۋدى. ورتالىققا وكپەنى جاساندى جەلدەتۋ اپپاراتىمەن جەتكىزىلدى. بالانى تولىق دايىنداعاننان كەيىن ءبىز ليمفا قۇرىلىمىن ءتىلۋ ءۇشىن وپەراسيا جاسادىق. وپەراسيا 75 مينۋتقا سوزىلدى. وتا ءساتتى ءوتتى، نارەستە ساۋىعىپ، ستاسيوناردان شىعارىلدى»، - دەپ ءتۇسىندىردى الماتى قالاسى بالالار شۇعىل مەديسينالىق كومەك ورتالىعىنىڭ بالالار حيرۋرگى جالعاس كۇنيازوۆ.
ليمفانگيوما - جۇكتىلىكتىڭ II تريمەسترىندە پايدا بولاتىن ليفما تامىرلارىنان تۇراتىن قاتەرسىز ىسىك.
كولەمى ۇلكەن بولا تۇرا، ىسىك دەنساۋلىققا ءقاۋىپتى جاعدايلاردى تۋدىرۋى مۇمكىن. ۋاقتىلى الىپ تاستاۋ وڭ بولجام جاساۋعا مۇمكىندىك بەرەدى.