ورتالىق قالالىق كينيكالىق اۋرۋحانا دارىگەرلەرى كوزىنىڭ تورلى قابىعىنا جارىق تۇسكەن ايەلگە جوعارى تەحنولوگيالىق وتا جاسادى.
قۇنى 700 مىڭ تەڭگەدەن اساتىن وپەراسيا مىندەتتى الەۋمەتتىك مەديسينالىق ساقتاندىرۋ شەڭبەرىندە جاسالدى، دەپ حابارلايدى Almaty-akshamy.kz اۋرۋحانانىڭ باسپا ءسوز قىزمەتىنە سىلتەمە جاساپ.
وفتالمولوگيا ءبولىمى مەڭگەرۋشىسى گۇلزات ءابرايىموۆانىڭ ايتۋىنشا، كوزدىڭ تورلى قابىعىنىڭ تامىرلاردان اجىراۋى اۋىر پاتولوگيادار قاتارىنا جاتادى.
مامان سوزىنە سۇيەنسەك، كوزدىڭ تورلىق قابىعىنىڭ اجىراۋىن دارىمەن نەمەسە ەكپەمەن ەمدەۋ مۇمكىن ەمەس. كورۋ قابىلەتىن قالپىنا كەلتىرۋدىڭ بىردەن-بىر جولى – كوزگە جەدەل وتا جاساۋ. سول سەبەپتى پاسيەنتتىڭ كوز دانارىن ساقتاپ قالۋ ماقساتىندا ميكروحيرۋرگيالىق مانيپۋلياسيا جاساۋ تۋرالى شەشىم قابىلدانعان. ونىڭ ۇستىنە، كوزدىڭ ارتقى تورلى قابىعىنىڭ اجىراۋى وپەراسيانى قيىنداتا تۇسكەن.
«كوزدىڭ تورلى قابىعى اجىراعان كەزدە كورۋ قابىلەتى ناشارلايدى جانە كوپ جاعدايدا پاسيەنت جانارىنان ايىرىلىپ قالادى. ادەتتە، تورلى قابىقتىڭ زاقىمدانۋىنا جاراقات پەن ميوپيا (كوزدىڭ جاقىننان كورمەۋى)، قانت ديابەتى، كوز ىشىندەگى ىسىك، قابىقتىڭ فورماسىنىڭ بۇزىلۋى سىندى جاعدايلار تۇرتكى بولۋى مۇمكىن. ءبىزدىڭ پاسيەنت جوعارى دەڭگەيدەگى ميوپيامەن اۋىرعان. ءبىز وعان ۆيترەكتوميا دەپ اتالاتىن وتا جاساپ، ىشىندەگى اينەك تارىزدەس دەنەنى ميكروحيرۋرگيالىق جولمەن الىپ تاستادىق، ورنىن ارنايى سۇيىقتىقپەن تولتىردىق»، - دەدى مامان.
مۇنداي كۇردەلى حيرۋرگيالىق وتالار جوعارى تەحنولوگيالاردىڭ كومەگىمەن جاسالادى. سەبەبى وتە نازىك بولىپ كەلەتىن تورلى قابىقتاعى ءاربىر جاسۋشا كوزدىڭ كورۋ قابىلەتىنە جاۋاپ بەرەدى.