الماتى قالالىق كارديولوگيا ورتالىعىندا جۇرەك-قانتامىر جۇيەسىن دياگنوستيكالاۋ جانە ەمدەۋ ءۇشىن يننوۆاسيالىق بىرەگەي وتا جاسالدى. ناقتىراق ايتساق، الماتىلىق حيرۋرگتەر العاش رەت جۇرەكتىڭ گيس بۋداسىنىڭ سول اياعىنا ەلەكترودتار ورناتتى. بۇل تىڭ ءادىس ستاندارتتى ەمدەۋ تيىمدىلىگى تومەن بولعان جاعدايدا جۇرەك جۇمىسىن جاقسارتۋعا باعىتتالعان. شەبەرلىك ءدارىسىن تانىمال پولشالىق كارديوحيرۋرگ ياسەك گايەك وتكىزدى.
– بۇل ءادىس اسىرەسە، براديكارديا، كارديوميوپاتيا جانە جۇرەك جەتكىلىكسىزدىگىمەن اۋىرعان قارت ناۋقاستارعا ءتيىمدى. ورناتىلعان ەلەكترود ارقىلى جۇرەكتىڭ قاعىسى دا رەتتەلەدى. ءبىز مۇنداي وپەراسيانى 2014 جىلدان بەرى جاساپ كەلەمىز. ناۋقاستاردىڭ 78%-ى وسىنداي ەم الىپ جاتىر. مەن وتكىزگەن شەبەرلىك ساباعى قازاقستاندىق دارىگەرلەر ءۇشىن پايدالى بولدى دەپ ويلايمىن، – دەدى ءبىر كۇندە بەس ناۋقاسقا بىرەگەي وپەراسيا جاساعان ياسەك گايەك.
ەلەكترود ورناتىلىپ، وپەراسيا اياقتالعاننان كەيىن پاسيەنت تەكسەرۋدەن وتەدى جانە وعان كىرىكتىرىلگەن قوسىمشاسى بار ارنايى سمارتفون بەرىلەدى. ول قۇرىلعى كۇنى بويى ناۋقاستىڭ دەنساۋلىعى تۋرالى اقپارات جينايدى جانە وڭدەلگەن مالىمەتتى دارىگەرگە جونەلتەدى.
ءيا، دارىگەرلەر جۇرەككە ورناتىلعان ەلەكترود ارقىلى ەندى ناۋقاستىڭ قاي جەردە ەكەندىگىنە قاراماستان ودان الىستا وتىرىپ-اق دەنساۋلىعىن باقىلاي الادى. ال جۇرەك قاعىسى ادەتتەگىدەن جاڭىلعان جاعدايدا دەرەۋ دارىگەرگە حابارلاما جىبەرىلەدى. بۇل ءوز كەزەگىندە دەر شاقتا شۇعىل قادامدار جاساۋعا جول اشادى.
– بۇل ءادىس وتكىزۋ قابىلەتى بۇزىلعان پاسيەنتتەر ءۇشىن وتە ءتيىمدى. يمپلانتاسيا پروسەدۋراسى اتريالدى فيبريللياسيا سياقتى كەيبىر اسقىنۋلاردىڭ دامۋ ءقاۋپىن ازايتادى. جۇرەگىندە اقاۋى بار ناۋقاستار اراسىندا جاس پاسيەنتتەر دە از ەمەس بۇگىندە. قالاي دەسەك تە بۇل تىڭ ءادىس وتادان كەيىن كەلەسى كۇنى-اق ۇيگە ورالۋعا مۇمكىندىك بەرەدى. ەڭ باستىسى – سمارتفون قۇرىلعىنى ءارقاشان وزىڭىزبەن بىرگە الىپ ءجۇرۋ، – دەيدى بىرەگەي وتاعا قاتىسقان قالالىق كارديولوگيا ورتالىعىنىڭ اريتمولوگى جالولحون تۇرسىنحانوۆ.