ءقازىر پاسيەنتتىڭ جاعدايى جاقساردى.
ورتالىق قالالىق كلينيكالىق اۋرۋحانانىڭ نەيروحيرۋرگيا ءبولىمىنىڭ دارىگەرلەرى جوعارى تەحنولوگيالاردى پايدالانا وتىرىپ جەدەل تۇردە وتا جاسادى. رەنتگەنوۆاسكۋليارلىق ستەنتتەۋ دەپ اتالاتىن وپەراسيا ناتيجەسىندە پاسيەنتىڭ ومىرىنە ءتونىپ تۇرعان ءقاۋىپ سەيىلىپ، ينسۋلت ءقاۋپى جويىلدى، دەپ حابارلايدى Almaty-akshamy.kz.
ورتالىق قالالىق كلينيكالىق اۋرۋحاناعا جەتكىزىلگەن 60 جاستاعى ەر ادام باسى اينالىپ، قاتتى اۋىرعانىن ايتىپ شاعىمدانعان. وعان قوسا اياق-قولى جانسىزدانىپ، كورۋ قابىلەتى ناشارلاعان، دەپ حابارلايدى وقكا باسپا ءسوز قىزمەتى.
حابارلاماعا سۇيەنسەك، تەكسەرۋ بارىسىندا مويىنداعى كۇرە تامىر 90 پايىزعا تارىلعان، ۇيقى ارتەرياسىنىڭ ستەنوزى دەگەن دياگنوز قويىلدى.
«كۇرە تامىرعا پۋنكسيا جاسالىپ، اتەروسكلەروزعا شالدىققان تامىرعا كاتەتەر ورناتتىق. سول ارقىلى تامىردىڭ تارىلعان تۇسىنا ستەنت قويىلىپ، ونىڭ قاندى وتكىزۋ قابىلەتى تولىق قالپىنا كەلتىرىلدى. مانيپۋلياسيالار تولىعىمەن رەنتگەن ساۋلەلەردىڭ كومەگىمەن، ارنايى جوعارى تەحنولوگيالىق انگيوگرافيالىق اپپارات ارقىلى جۇرگىزىلدى»، - دەيدى نەيروحيرۋرگيا ءبولىمى مەڭگەرۋشىسى، دارىگەر مارات الماتوۆ.
دارىگەرلەردىڭ ايتۋىنشا، وتا ءساتتى ءوتتى، ءقازىر پاسيەنتتىڭ جاعدايى جاقساردى.
ەستەرىڭىزگە سالا كەتسەك، ورتالىق قالالىق كلينيكادا تۇرعىندارعا ميداعى قان تامىرلارىنا جاسالاتىن جوسپارلى جانە شۇعىل وتالاردىڭ بارلىق ءتۇرى جۇرگىزىلەدى. وپەراسيالار، سونىڭ ىشىندە جوعارى تەحنولوگيالاردىڭ كومەگىمەن جاسالاتىن مانيپۋلياسيالار مىندەتتى الەۋمەتتىك مەديسينالىق ساقتاندىرۋ ەسەبىنەن تەگىن جۇرگىزىلەدى.
