ءۇش مينۋت ىشىندە الماتىلىق رەنتگەنحيرۋرگتەر ناۋقاستا ميوكارد ينفاركتىسىنىڭ الدىن الدى
الماتىلىق رەنتگەنحيرۋرگتەر ايەلدى ميوكارد ينفاركتىسىنەن قۇتقاردى، ونىڭ سالدارىن بولجاۋ مۇمكىن ەمەس كورىنەدى، دەپ حابارلايدى Almaty-akshamy.kz.
11 قىركۇيەكتە شۇعىل تۇردە الماتى كارديولوگيالىق ورتالىعىنا جۇرەك اۋرۋى بار ايەل جەتكىزىلگەن. دياگنوستيكالىق تەكسەرۋ دەرەۋ جۇرگىزىلگەن. ناۋقاستىڭ ءوزى ايتقانداي، 7 قىركۇيەكتەن باستاپ ول جۇرەگىندە اۋىرسىنۋ سەزىنگەن. ءبىراق ول وعان ءمان بەرمەگەن. تەك 11 قىركۇيەكتە عانا جەدەل جاردەم شاقىرعان. ويتكەنى، جانىنا باتقان اۋىرۋعا شىداۋ مۇمكىن بولماعان.
«ناۋقاستىڭ تروپونينگە قان سكرينينگى وڭ ناتيجە بەردى — 0،99 نگ/مل، ادەتتە ول 0،04% بولۋى كەرەك. بۇل شامامەن 20 ەسە كوپ بولىپ تابىلادى. ميوكارد ينفاركتىسىنىڭ بولۋىن كورسەتەتىن قانداعى وسى ءتروپونيننىڭ جوعارىلاۋى. سونىمەن قاتار، كوروناروگرافيا جۇرگىزىلدى، وندا جۇرەكتىڭ بارلىق ءۇش تامىرىنىڭ زاقىمدانۋى انىقتالدى، ولاردىڭ بىرەۋى 99%-عا بىتەلىپ قالعان. ەگەر تاعى ءبىراز ۋاقىت وتسە، ول 100%-عا جەتىپ، ميوكارد ينفاركتىسىنە اكەلەتىن ەدى. ءبىز ستەنتتەۋ جۇمىستارىن جۇرگىزدىك. بۇل شاعىن ءينۆازيۆتى حيرۋرگيا، كەۋدە قۋىسى كەسىلمەيدى. ءۇش مينۋتتىڭ ىشىندە ءبىز قانعا تولا باستاعان ارتەريانى اشتىق»، — دەيدى رەنتگەنحيرۋرگيا بولىمشەسىنىڭ مەڭگەرۋشىسى ورازبەك ساحوۆ.
ونىڭ ايتۋىنشا، ادامنىڭ جۇرەگىندە ءۇش قان تامىرى بار، ناۋقاستا سونىڭ ۇشەۋى دە — بىرەۋى 99%-عا، ەكىنشىسى 80%-عا جانە ءۇشىنشىسى 50%-عا زاقىمدالعان بولدى. ورازبەك ساحوۆ اتاپ وتكەندەي، قالعان ەكى قان تامىرعا بىرتىندەپ وتا جاساۋ كەرەك، بارلىق قان تامىردى ءبىر ۋاقىتتا اشۋ مۇمكىن ەمەس. ويتكەنى مۇنداي وتانى ناۋقاس كوتەرە الماي قالۋى دا مۇمكىن.
«ءبىز ءقازىر ينفاركتپەن بايلانىستى ارتەريانى اشىپ، قان اعىمىن قالپىنا كەلتىردىك، وسى كەزەڭدە وتانى توقتاتقان ءجون، ويتكەنى ەگەر ءبىز باسقا ارتەريالاردى اشۋعا تىرىسساق، وندا ميوكارد ينفاركتىسىنىڭ جاڭا ايماعىندا اسقىنۋ پايدا بولۋى مۇمكىن. تەك 2-3 ايدان كەيىن باسقا جۇرەك-قان تامىرلارىنا وتا جاساۋعا بولادى. ءقازىر ناۋقاس ءوزىن جاقسى سەزىنەدى. ءبىرىنشى وپەراسيا ءساتتى ءوتتى»، — دەپ تۇيىندەدى دارىگەر.