56 جاستاعى ناۋقاس ايەل ورتالىق كلينيكالىق اۋرۋحاناعا اۋىر جاعدايدا كەلىپ تۇسكەن.
الماتىدا دارىگەرلەر ايەلدەن سالماعى 10 كەلىدەن اساتىن الىپ ىسىكتى الىپ تاستادى، دەپ حابارلايدى Almaty-akshamy.kz.
جاتىر ىسىگى جۇكتىلىكتىڭ 40-اپتاسىنا سايكەس كەلدى. ىسىكتىڭ كولەمى ۇلعايعانى سونشالىقتى، ناۋقاستىڭ تىنىس الۋى قيىنداعان. ىسىكتىڭ سالماعى 10 كەلىدەن جوعارى. سونىمەن قاتار، ايەل تاحيكارديا، قانت ديابەتى، قان قىسىمىنىڭ تومەندىگى جانە باسقا دا سوزىلمالى اۋرۋلاردان زارداپ شەگىپ كەلگەن.
دارىگەرلەر اقىلداسا كەلىپ، وتا جاساۋ تۋرالى شەشىم قابىلداندى.
"بۇل وتا جاتىر مويىنىن الىپ تاستاۋ ءۇشىن جاسالدى. بارلىق ىسىكتىڭ قالدىقتارى الىنىپ تاستالدى. وتا ەكى ساعاتقا سوزىلدى جانە ءساتتى ءوتتى. ءقازىر ناۋقاس ءوزىن جاقسى سەزىنەدى، جاعدايى تۇراقتى. جاقىن ارادا شىعاراتىن بولامىز"، - دەيدى گينەكولوگ دارىگەر اليسا باينازاروۆا.
ناۋقاس ءقازىر ورتالىق قالالىق كلينيكالىق اۋرۋحانانىڭ گينەكولوگيا بولىمىندە ەم قابىلداپ جاتىر.
"20 جىل بۇرىن ىسىك پايدا بولدى، باسىندا كىشكەنتاي بولدى، كەيىن بۇل تۇيىرشىك وسە باستادى. مەن جۇرەگىمدى تەكسەرتۋگە بارسام، ولار ماعان جاتىردى تەكسەرۋ كەرەكتىگىن ايتقان بولاتىن. ءبىراق ول كەزدە مەن ءمان بەرمەدىم. 2021 جىلى مەن كوروناۆيرۋس ينفەكسياسىمەن اۋرۋحاناعا ءتۇستىم. دارىگەرلەر مەنى تولىق تەكسەرىستەن وتكىزىپ، ۋدز-گە ءتۇسىردى. ولار شىعارىلعاننان كەيىن ماماندارعا حابارلاسۋ كەرەگىن ەسكەرتكەن. ءبىراق مەن ءمان بەرمەدىم. جىلدار جىلجىپ، ادەتتەگىدەي ءۇي شارۋاسىمەن ۋاقىت وتە بەردى"، - دەيدى ايەل.
گينەكولوگ اليسا باينازاروۆانىڭ سوزىنشە، قازىرگى ۋاقىتتا جاتىر ىسىگى كەڭ تاراعان دەرتكە اينالعان. دارىگەر ايەل ادامدار اۋىر دەرتكە شالدىقپاس ءۇشىن گينەكولوگ ماماندارىنا ءجيى كورىنىپ تۇرۋى كەرەگىن ايتادى.