الماتى ينفەكسيالىق ستاسيونارلاردىڭ مەديسينا قىزمەتكەرلەرى كۆي ينفەكسياسىنىڭ اۋىر زارداپتارىنان قورعانۋ ءۇشىن كەلىپ، ۆاكسينالانۋعا شاقىردى. «قىزىل» ايماقتاردا جۇمىس ىستەيتىن دارىگەرلەر قالا تۇرعىندارىنا بەينەحابارلاما ءتۇسىردى.
بۇگىندە الماتىدا 23 كوۆيدتىك ستاسيونار بار، ولاردا ۆيرۋسپەن كۇرەستىڭ الدىڭعى قاتارىندا ەمحانالار، اۋرۋحانالاردىڭ باسشىلارى، دارىگەرلەر، رەانيماتولوگتار، مەدبيكەلەر، لابورانتتار مەن مەدبيكەلەر جۇمىس ىستەيدى. مەديسينا قىزمەتكەرلەرىنىڭ جۇكتەمەسى وتە ۇلكەن. «قىزىل» ايماقتا 5 مىڭعا جۋىق پاسيەنت بار، تاعى 10 مىڭنان استامى ءۇي باقىلاۋىندا.
الماتىلىق رەانيماتولوگتار جانساقتاۋ بولىمىنەن بەينەۇزىك ءتۇسىردى، سونىمەن قاتار ناۋقاستاردىڭ قالاي ەمدەلەتىنىن كورسەتتى.
دارىگەرلەردىڭ ايتۋىنشا، ۆاكسينالانباعان ناۋقاستاردا اۋرۋ اۋىر وتۋدە. سونىمەن قاتار، ولار ىشكى اعزالاردى زاقىمدايتىن ۆيرۋستىڭ جاڭا نۇسقالارىنىڭ نىساناسىنا اينالادى. «قىزىل» ايماق دارىگەرلەرى فيزيكالىق تۇرعىدان عانا ەمەس، پسيحولوگيالىق تۇرعىدان دا قيىن.
فتيزيوپۋلمونولوگيا ورتالىعىنىڭ رەانيماتولوگ دارىگەرى ءابىش دوسمۇراتوۆ جانساقتاۋ ءبولىمىنىڭ 30 ورنىنىڭ بارلىعى قولدانىستا ەكەنىن ايتتى. كوۆيدتىك ستاسيوناردا تۇسىرىلگەن كادرلار قانشا ادامنىڭ جەلدەتكىشكە قوسىلعانىن كورسەتەدى. بۇل ينتەرنەتپەن «قورقىتۋ» ەمەس، الماتىداعى شىنايى احۋال.
سوڭعى اپتادا جۇقتىرعاندار سانى 1،2 ەسەگە ءوستى. وتكەن تاۋلىكتە الماتىدا كوروناۆيرۋستىق ينفەكسيانىڭ تاعى 1 540 جاعدايى تىركەلدى، شىلدەدە 20 مىڭعا جۋىق ادام جۇقتىرعان. اۋرۋحاناعا جاتقىزىلاتىن جاعدايلار سانى پروپورسيونالدى تۇردە ارتىپ كەلەدى. ەگەر ءبىر اي بۇرىن كۇنىنە 40-70 ناۋقاس اۋرۋحاناعا تۇسسە، ءقازىر ولاردىڭ سانى 10 ەسەگە ارتتى.
ءوسۋدىڭ سەبەبى «دەلتا» شتامىنىڭ تارالۋى بولدى، ول تەز جۇعادى ءارى كلينيكالىق كورىنىستەرى وتە اۋىر.
«ۆيرۋس وتە جۇقپالى، بىزدە رەانيماسياداعى بارلىق ورىندار تولى. ءبىزدىڭ اۋرۋحانا كوۆيدتىك ستاسيونار بولىپ قايتا جاساقتالدى. ناۋقاستاردىڭ سانى كۇندەلىكتى وسۋدە. ينفەكسيا تىزبەگىن توقتاتۋ ءۇشىن ۆاكسينالانۋ قاجەت. بۇل - بۇگىنگى جالعىز قورعانىس شاراسى»، - دەيدى ءا. دوسمۇراتوۆ.
فتيزيوپۋلمونولوگيا ورتالىعىنىڭ تاعى ءبىر رەانيماتولوگى نۇرسۇلتان ەرجىگىتوۆ ستاسيوناردا ۆاكسينالانباعان ناۋقاستار بار ەكەنىن ايتتى. ولاردىڭ يممۋنيتەتى اۋىر ۆيرۋسقا قارسى قورعالماعان.
«ءبىز الماتىلىقتارعا ۆاكسينالانعاندا عانا پاندەميانى جەڭدىك دەپ جاريالاي الامىز. بۇل - كوروناۆيرۋستى جۇقتىرماۋدىڭ جانە ونىڭ ودان ءارى تارالۋىن توقتاتۋدىڭ ەڭ ءتيىمدى جولى. كوۆيدتى جەڭۋدىڭ بۇدان باسقا جولى جوق»، - دەدى ن. ەرجىگىتوۆ.
ونىڭ بۇل پىكىرىمەن كوروناۆيرۋستىڭ ەكىنشى تولقىنى باستالعالى كۆي ناۋقاستارىن ەمدەيتىن فتيزيوپۋلمونولوگيا ورتالىعىنىڭ رەانيماتولوگ-انەستەزيولوگى دانيار جەيسەمبايەۆ تا كەلىسەدى. وسى ۋاقىت ىشىندە دارىگەر دەمالىسسىز جۇمىس ىستەپ، ادامداردىڭ ءومىرىن ساقتاپ قالۋدا. ونىڭ ايتۋىنشا، جۇمىس كەزىندە جانساقتاۋ بولىمىنەن 400-گە جۋىق ناۋقاس وتكەن.
«بۇگىندە ناۋقاستاردىڭ 80%-عا جۋىعى - كوروناۆيرۋستىڭ «دەلتا» شتامىن جۇقتىرعاندار. ول اسا ءقاۋىپتى ءارى ەشكىمدى ايامايدى. سوندىقتان بەتپەردە تاعىپ، ادامدار كوپ جينالعان ورىنداردان اۋلاق بولىپ، ەكپە سالدىرۋ قاجەت. بۇگىندە ءبىز جاستاردىڭ جانساقتاۋ بولىمىنە ءجيى تۇسەتىنىن كورۋدەمىز. قازاقستاندا ميلليوننان استام ادام كوروناۆيرۋسقا قارسى ەكپە الدى. ۆاكسينالاۋ ءوزىنىڭ تيىمدىلىگى مەن قاۋىپسىزدىگىن كورسەتتى، سوندىقتان يممۋنيتەتتى قالىپتاستىرۋ ءۇشىن تەز ارادا ۆاكسينالانۋ قاجەت»، - دەپ اتاپ ءوتتى د. جەيسەمبايەۆ.
ستاسيونارلاردا 4930 ناۋقاس جاتىر، ونىڭ ىشىندە 240 بالا. اۋرۋحاناعا جاتقىزىلعانداردىڭ 3563ء-ى – ورتاشا، 1207 – اۋىر جاعدايدا. جانساقتاۋ جانە ينتەنسيۆتى تەراپيا بولىمىندە 310 ادام بار، ونىڭ ىشىندە 160-ىنىڭ جاعدايى اۋىر.