بۇل الماتى قالاسىنداعى قازاقستان ايەلدەر كۇشتەرى اليانسى مەن جەرگىلىكتى اكىمدىكتىڭ باستاماسىنىڭ ارقاسىندا مۇمكىن بولماق، دەپ حابارلايدى Almaty-akshamy.kz
وسى جەكسەنبى، 23 ساۋىردە، ساعات 19.00-دە «الماتى ارەنا» الاڭىندا «جاستار تازا اۋا ءۇشىن» اتتى مۇز شوۋى قايىرىمدىلىق اكسياسى وتەدى. وڭىرلىك كوممۋنيكاسيالار قىزمەتىندە وتكەن بريفينگتە الماتىلىق اۋەسقوي مانەرلەپ سىرعاناۋشىلاردى ونەر كورسەتۋگە شاقىردى.
اتاپ ايتساق، بۇل جاي عانا مۇز شوۋى ەمەس، مەگاپوليس ەكولوگياسىن قولداۋعا ارنالعان ناعىز سپورتتىق، اسەرلى SOI (مۇزداعى ستۋدەنتتەر) «جاستار تازا اۋا ءۇشىن» شاراسى. بەس اي بويى جاتتىقتىرۋشى – سپورت شەبەرى، قازاقستان چەمپيونى، ازيا جارىستارىنىڭ چەمپيونى رەگينا گلازماننىڭ جەتەكشىلىگىمەن كۇندەلىكتى جاتتىعۋدان وتكەن الماتىلىق 11 جۇپ ستۋدەنت كونكي تەبۋ بيىگىنە كوتەرىلدى.
«مۇز شوۋىنا ساتىلعان بيلەتتىڭ اقشاسى تۇركسىب اۋدانىنداعى 20 مۇقتاج وتباسىنىڭ جەكە ءۇيىن گازداندىرۋعا جۇمسالادى. ءبىزدىڭ ماقساتىمىز - جاستاردىڭ نازارىن الەۋمەتتىك ماڭىزدى ماسەلەلەرگە اۋدارۋ. ولار قانداي قۇندىلىقتاردى قولداۋ جانە ولاردى ناسيحاتتاۋعا قاتىسۋ كەرەكتىگىن تۇسىنۋلەرى ءۇشىن ايەلدەر كۇشتەرىنىڭ اليانسى اكىمدىكتىڭ قاتىسۋىمەن بارلىق ماسەلەلەردى ۇيىمداستىرۋدى ءوز قولىنا الدى»، – دەيدى قازاقستان ايەلدەر كۇشتەرى اليانسىنىڭ ءتورايىمى راۋشان سارسەمبايەۆا.
ۇيىمداستىرۋشىلار بۇل شارانىڭ شىعىندارىن ازايتىپ، قالانىڭ ەكولوگيالىق جاعدايىن جاقسارتادى دەپ سەنەدى. شوۋ بيلەتتەرى 5000 تەڭگەدەن باستالادى. ولاردى ساتىپ الۋ ارقىلى كورەرمەندەر قايىرىمدىلىق اكسياسىنىڭ بەلسەندى قاتىسۋشىلارىنا اينالادى.
سونىمەن قاتار، ەكى كۇن بۇرىن بەلسەندى ايەلدەر جاستاردىڭ قاتىسۋىمەن تاعى ءبىر اعاش وتىرعىزۋ ەكوجوباسىن باستادى.
قازاقستان ايەلدەر كۇشتەرى اليانسىنىڭ الماتى قالاسى بويىنشا ءتوراعاسى بالىم باتايەۆا مەگاپوليستە پاتريوتتار تاربيەلەنەتىن جاس كوشباسشىلار مەكتەبى اشىلعانى تۋرالى پىكىر قوستى. ال ءقازىردىڭ وزىندە بار «جاستار تازا اۋا ءۇشىن» جوباسى ۋنيۆەرسيتەت ستۋدەنتتەرىنىڭ ارقاسىندا جارىققا شىقتى.
«ەشقاشان كونكي تەپپەگەن ستۋدەنتتەر تۇنگى ەكىگە دەيىن كونكي تەبۋدى ۇيرەندى. مەن ولاردىڭ مۇز ايدىنىندا ناتيجەگە جەتۋگە دەگەن ۇمتىلىسىنا ءارقاشان ءتانتى بولدىم. ءبىز جاستارعا ءوز ويىن جەتكىزۋگە، باسقا ستۋدەنتتەرگە ۇلگى كورسەتۋگە كومەكتەسەمىز. سونىمەن قاتار بۇل جاي عانا قويىلىم ەمەس، قايىرىمدىلىق كەشى بولماق. شارانى وتكىزۋگە قولداۋ كورسەتكەن الماتى قالاسىنىڭ اكىمى ەربولات دوسايەۆقا العىسىمىز شەكسىز.
ستۋدەنتتەردىڭ قۋانىپ، شاتتانعانىن كورسەڭىزدەر. ەندى قالا تۇرعىندارىنىڭ قولداۋىمەن بيلەت ساتىپ الىپ، وسى جوبانىڭ قاتىسۋشىسى بولىپ، باعالى سىيلىقتار ۇتىسىنا قاتىسا الاتىنىن كورگىم كەلەدى»، - دەپ ءبولىستى ءوز ويىن بالىم باتايەۆا.
بەلسەندى ايەلدەر ازىرگە ۇيلەرىن، وتباسىن وتىنمەن جىلىتاتىن مۇقتاج 20 وتباسىنا جەكە بارعاندارىن ايتتى.
«كومىر جاعۋ اۋانىڭ لاستانۋى مەن ادام دەنساۋلىعىنا ۇلكەن ەكولوگيالىق ءقاۋىپ توندىرەدى. 2019 جىلى الماتى الەمدەگى ەكولوگيالىق ءقاۋىپتى 100 قالانىڭ قاتارىنا ەندى، 95ء-شى ورىندى يەلەنگەن. ءبىز بىرلەسكەن كۇش-جىگەر ارقىلى قالامىزدىڭ گۇلدەنۋىنە اسەر ەتە الامىز دەپ ويلايمىن»، - دەپ قوستى ءسوز سوڭىندا «ايەلدەر كۇشتەرى اليانسى» ۇيىمىنىڭ مۇشەسى، جوبانىڭ دەمەۋشىسى اراي تولەمىسوۆا.
ايتا كەتەك، قازاقستان ايەلدەر كۇشتەرىنىڭ اليانسى 2019 جىلدان بەرى ايەلدەر مەن بالالاردىڭ قۇقىقتارىن قورعاۋ سالاسىندا قىزمەت جاسايدى، سونداي-اق الەۋمەتتىك وتكىر ماسەلەلەردى شەشۋگە دە بەلسەندى تۇردە قاتىسادى.
قازىرگى ۋاقىتتا اليانس فيليالدارى ەلىمىزدىڭ 20-دان استام وڭىرىندە كەڭ قۇرىلىمعا يە جانە حالىقتىڭ الەۋمەتتىك وسال توپتارىنداعى جۇمىسسىز ايەلدەردى وقىتۋعا جانە جۇمىسقا ورنالاستىرۋعا ارنايى «باستاۋ»، «جاردەم» سياقتى الەۋمەتتىك ماڭىزى بار جوبالاردى جۇزەگە اسىرۋعا باعىتتالعان.