الماتىدا دەسانتتىق ءبولىم قويمالارىنان ءىرى ۇرلىق جاساعان اسكەري قىزمەتشىلەرگە قاتىستى سوت ۇكىمى شىقتى، دەپ حابارلايدى Almaty-akshamy.kz. Tengrinews.kz-كە سىلتەمە جاساپ.
الماتى گارنيزونىنىڭ اسكەري سوتى وفيسەرلەر مەن سەرجانتتار اتاعىنداعى اسكەري قىزمەتشى سانالاتىن 16 سوتتالۋشىعا، سونداي-اق اسكەري پروكۋراتۋرانىڭ ءبىر قىزمەتكەرىنە قاتىستى ءىستى قارادى. تەك وسى ءىس بويىنشا ۇكىم 200-گە جۋىق بەت، ال ءىستىڭ ءوزى 70-تەن اسا توم بولعان. ايىپتالۋشىلارعا پارا بەردى جانە الدى، تاپشىلىقتى انىقتامادى، الاياقتىق، بوپسالاۋ جانە ارميا قويمالارىنان اسا ءىرى كولەمدە ۇرلىق جاسادى دەگەن ايىپتار تاعىلعان.
تەرگەۋ ورگاندارى 5829 اسكەري مۇلىكتى ۇرلاۋدى ۇيىمداستىردى دەپ ايىپتالعانداردى اشكەرەلەدى: جازعى جانە قىسقى كامۋفلياج جيىنتىقتارى، جازعى جانە قىسقى اياق كيىمدەر، سونداي-اق جۇمىس نىسانىنىڭ بەس اتاۋىنىڭ ءارقايسىنان 1400-دەن. ۇرلانعان كيىم-كەشەك پەن جاراقتاردىڭ بالانستىق قۇنى 88 ميلليون تەڭگەدەن اسادى. كيىم الماتىداعى "ميزام" بازارىندا تومەن باعامەن 25،4 ميلليون تەڭگەگە ساتىلعان.
بۇل رەتتە سوت الاياقتىق (190-باپ)، وكىلەتتى نەمەسە لاۋازىمدىق وكىلەتتى اسىرا پايدالانۋ (451-باپ)، پارا بەرۋگە يتەرمەلەۋ (367)، سونداي-اق اسا ءىرى مولشەردە بوتەننىڭ مۇلكىن ۇرلاۋدى (قك-نىڭ 189-بابى 4-بولىگى 2-تارماعى) ۇيىمداستىرۋ بويىنشا اسكەري ءبولىم باستىعى، پولكوۆنيك ا.ب. كىنالى دەپ تانىدى. ول ءومىر بويىنا مەملەكەتتىك قىزمەت اتقارۋ قۇقىعىنان ايىرىلا وتىرىپ، مۇلكى تاركىلەنبەي، سەگىز جىلعا باس بوستاندىعىنان ايىرىلدى.
تىلداعى قامتاماسىز ەتۋ باسقارماسىنىڭ ينسپەكتورى، دەسانتتىق-شابۋىلداۋ اسكەرلەرى قولباسشىسى، پودپولكوۆنيك د.ي. پارا بەرۋشىلەردىڭ پايداسىنا جاساعان ارەكەتتەرى (ارەكەتسىزدىگى) ءۇشىن ۇلكەن مولشەردە پارا العانى ءۇشىن (قك-نىڭ 366-بابى 3-بولىگى)، سونداي-اق الدىن الا ءسوز بايلاسۋ بويىنشا ادامدار توبىنىڭ اسا ءىرى مولشەردە ۇرلىقتى ۇيىمداستىرعانى ءۇشىن كىنالى دەپ تانىلدى. وعان مۇلكى تاركىلەنبەي، سەگىز جىلعا باس بوستاندىعىنان ايىرۋ تۇرىندەگى جازا تاعايىندالدى، جازاسى ورتاشا قاۋىپسىزدىك قىلمىستىق-اتقارۋ جۇيەسىنىڭ مەكەمەلەرىندە وتەلەدى.
سونداي-اق، ۇرلىق پەن پارانى ۇيىمداستىرعانى ءۇشىن تىلداعى قامتاماسىز ەتۋ باسقارماسىنىڭ اعا وفيسەرى (ينسپەكتورى)، دەسانتتىق-شابۋىلداۋ اسكەرلەرىنىڭ قولباسشىسى پودپولكوۆنيك ا.ز. ايىپتالىپ، وعان مۇلكىن تاركىلەمەي سەگىز جىلعا باس بوستاندىعىنان ايىرۋ جازاسى تاعايىندالدى.
29219 اسكەري ءبولىم قويمالارىنىڭ ەكى باستىعى ن.ۋ. جانە د. ب. پارا بەرۋگە وقتالعانى (سوڭعىسى پارا بەرگەنى ءۇشىن) جانە ۇرلاۋعا جاردەمدەسكەنى ءۇشىن كىنالى دەپ تانىلىپ، جازاسىن وتەۋدىڭ بارلىق مەرزىمىنە جىل سايىن 100 ساعاتقا ءماجبۇرلى ەڭبەككە تارتا وتىرىپ، جەتى جىلعا باس بوستاندىعىن شەكتەۋگە ۇكىم شىعاردى.
تاعى ءبىر قويما باسشىسى ت.ت.، تەك بوتەننىڭ مۇلكىن جىمقىرعانى ءۇشىن كىنالى دەپ تانىلىپ، جەتى جىلعا باس بوستاندىعىنان ايىرۋ جازاسىنا جىل سايىن 100 ساعاتتان ءماجبۇرلى ەڭبەكپەن باس بوستاندىعىنان ايىرىلدى.
بارلىق سوتتالۋشىدان مەملەكەتكە 88 ميلليون تەڭگە، ءارقايسىنان 14 ميلليون تەڭگە ماتەريالدىق شىعىن ءوندىرىلۋى ءتيىس.