الماتىلىق ايەل ازىق-تۇلىك دۇكەندەرىنە ۇرلىققا تۇسكەن

مەدەۋ اۋدانىنىڭ پوليسەيلەرى ءبىرقاتار ۇرلىق جاسادى دەگەن كۇدىكپەن 34 جاستاعى ت.ەسىمدى ازاماتشانى ۇستادى. 

تەرگەۋ بارىسىندا كۇدىكتىنىڭ زاڭسىز بايۋ ماقساتىندا ۇيلەردىڭ اۋلاسىندا ورنالاسقان شاعىن دۇكەندەرگە كىرىپ جۇرگەندىگى انىقتالدى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«ساتۋشىلار كەلۋشىلەرگە قىزمەت كورسەتۋمەن قولى بوساماي جاتقاندا، ونىڭ ارەكەتىنە ەشكىم قاراپ تۇرماعان كەزدە، ول جابىرلەنۋشىلەردىڭ مۇلكىن: ۇيالى تەلەفوندار، ءاميان نەمەسە باسقا دا قۇندىلىعى بار زاتتاردى ۇرلاپ كەتكەن. قازىرگى ۋاقىتتا ۇستالعان ازاماتشانىڭ 5 بوتەننىڭ مۇلكىن ۇرلاۋعا قاتىسى بار ەكەندىگى انىقتالدى. ءقازىر ونىڭ جەكە باسى بۇرىن جاسالعان وسىنداي قىلمىستارعا قاتىسىنىڭ بار-جوعى تەكسەرىلۋدە. بۇل دەرەكتەر ءبىر وندىرىسكە بىرىكتىرىلىپ، قىلمىستىق ءىس ق ر قك-نىڭ 188-بابى 3-بولىگىنىڭ 2-تارماعى (ۇرلىق، ياعني بوتەننىڭ مۇلكىن بىرنەشە رەت جاسىرىن جىمقىرۋ) بويىنشا تەرگەلۋدە»، – دەدى مەدەۋ اۋداندىق پوليسيا باسقارماسىنىڭ باستىعى داۋرەن وتەبايەۆ.

پوليسيا قىزمەتكەرلەرى قالا تۇرعىندارىنا جۇگىنەدى. وسى ادامنىڭ قىلمىستىق ارەكەتىنەن زارداپ شەككەندەردى، ءتارتىپ ساقشىلارى مىنا تەلەفون نومىرلەرى ارقىلى حابارلاسۋدى سۇرايدى: 254-48-02؛ 254-48-10؛ 8-702-476-6660.