الماتى قالاسى مەن تۇركىستان وبلىسىنىڭ اكىمدىكتەرى ەرتە پىسكەن جىلىجاي قىرىققاباتىنىڭ تىكەلەي جەتكىزىلىمى جونىندەگى ءوزارا ىنتىماقتاستىق تۋرالى مەموراندۋمعا قول قويدى، دەپ حابارلايدى Almaty-akshamy.kz
كوشپەلى كەڭەس بارىسىندا تاراپتار تۇركىستان وبلىسىنىڭ سارىاعاش، كەلەس جانە سايرام اۋداندارىنداعى شارۋاشىلىق قوجالىقتاردى بارىپ كوردى.
قول جەتكىزىلگەن كەلىسسوزدەر شەڭبەرىندە 2022 جىلعى 15 ساۋىردەن باستاپ، 15 مامىردى قوسا العانداعى كەزەڭدە الماتىنىڭ ساۋدا جەلىلەرىنە تىكەلەي شارۋاشىلىق القاپتارىنان ساتىپ الۋ باعاسى ءبىر كەلىسى ءۇشىن 140 تەڭگە بولىپ بەكىتىلگەن باعا بويىنشا 550 توننا («ماگنۋم» ساۋدا جەلىسىنە – 300 توننا، «سمولل» ساۋدا جەلىسىنە – 200 توننا، «تويمارت» ساۋدا جەلىسىنە – 50 توننا) قىرىققابات جەتكىزىلەتىن بولادى. بۇل رەتتە سورەدەگى بولشەك ساۋدا باعاسى ءبىر كەلىسى ءۇشىن شامامەن 185 تەڭگەنى قۇرايدى.
سونداي-اق، مەموراندۋمعا سايكەس، 2022 جىلعى ماۋسىمنان باستاپ، ەگىس القابىندا وسىرىلگەن قىرىققاباتتىڭ شامامەن 2 مىڭ توننا مولشەرىنىڭ ۇزدىكسىز جەتكىزىلىمى ۇيىمداستىرىلاتىن بولادى.
قابىلدانعان شارالار قىرىققاباتتىڭ باعاسىن ۇستاپ تۇرۋعا، الەۋمەتتىك ماڭىزى بار ونىمگە باعانىڭ نەگىزسىز وسۋىنە جول بەرمەۋگە مۇمكىندىك بەرەدى.