الماتىعا پاۆلوۆنيا اعاشىن وتىرعىزۋ ۇسىنىلدى

قالاداعى اعاشتار جايى باستى نازاردا

الماتىدا قۇرتتاعان جاسىل جەلەك ورنىنا پاۆلوۆنيا اعاشىن ەگۋ ۇسىنىلدى، دەپ حابارلايدى Almaty-akshamy.kz. 24.kz-كە سىلتەمە جاساپ.

الماتىداعى 3 ميلليونعا جۋىق اعاشتىڭ تورتتەن ءبىرى جارامسىز. اعاشتار قارتايىپ، كوبىنە قۇرت تۇسكەن. وسىلاي دەپ دابىل قاققان تابيعات جاناشىرلارى قالانىڭ جاسىل جەلەگىنە كۇردەلى وزگەرىس كەرەك دەيدى.

ولار شاھاردىڭ جاسىل قورىن قالپىنا كەلتىرىپ، ەكولوگياسىن جاقسارتۋدىڭ ءتيىمدى جولىن ۇسىنىپ وتىر. جالپاق جاپىراقتى مىنا اعاشتىڭ ەگىلگەنىنە 3 جىل عانا بولعان. قازىرگى بيىكتىگى 10 مەترگە جۋىقتايدى.

بيولوگ عالىمدار مەن تابيعات جاناشىرلارىنىڭ نازارىن اۋدارىپ وتىرعان پاۆلوۆنيا اعاشى وسى. قيىر شىعىس پەن وڭتۇستىك-شىعىس ازيادا كەڭ تارالعان وسىمدىك ەۋروپا مەن امەريكانىڭ باقتارىندا دا ءجيى وسىرىلەدى. بۇل اعاش ءتۇرىنىڭ ەلىمىزدە وسەتىن جاسىل جەلەكتەردەن ارتىقشىلىعى كوپ. مىسالى، پاۆلوۆنيانىڭ بيىكتىگى 9 جىلدا 20 مەترگە دەيىن جەتەدى.

وعان قوسا، جالپاق جاپىراقتارى كومىرقىشقىل گازىن وزگە اعاشتارعا قاراعاندا 10 ەسە كوپ سىڭىرەدى ەكەن.

«الماتى قالاسىندا وسىرۋگە بولادى. ءبىر عانا جاعداي - ءبىر جىلدىق اعاشتى جاقسى كۇتۋ كەرەك. ياعني ءبىر جىلدان قىستاۋ فازاسىنا كەتكەن كەزدە اعاشتى دجۋت دەگەن ماتەريالمەن وراۋ كەرەك. سول كەزدە ونىڭ تامىرىنا ەشقانداي دا ۇسىك بارمايدى. اعاش ۇسىمەيدى دە، ءارى قاراي ەكىنشى، ءۇشىنشى جىلى ءوسىپ كەتەدى»، - دەدى ج. جيەمبايەۆ اتىنداعى وسىمدىك قورعاۋ جانە كارانتين عزي جەتەكشى عىلىمي قىزمەتكەرى گۇلناز مەڭدىبايەۆا.