اقش-تان، فرانسيادان، شۆەسيادان، ليتۆادان، وزبەكستاننان، قىرعىزستاننان جانە پولشادان كەلگەن نەوناتولوگتار قازاقستاندىق ارىپتەستەرىمەن بىرگە 25 جانە 26 قىركۇيەكتە الماتىدا ءوتىپ جاتقان عىلىمي-پراكتيكالىق كونفەرەنسيا الاڭىندا كەزدەستى. ول قازاقستاندا العاش رەت وتكىزىلىپ وتىر جانە جاڭا تۋعان جانە شالا تۋعان بالالارعا مەديسينالىق كومەك كورسەتۋ ساپاسىن جاقسارتۋعا جانە ەلىمىزدەگى نەوناتالدىق ءولىم-جىتىم كورسەتكىشتەرىن ودان ءارى تومەندەتۋگە باعىتتالعان، دەپ حابارلايدى aqshamnews.kz.
بۇل فورۋمدا ءارتۇرلى ەلدەردىڭ جەتەكشى ماماندارى نەوناتولوگيا سالاسىنداعى نەگىزگى ماسەلەلەردى، سونىڭ ىشىندە التىن ساعاتتا جاڭا تۋعان نارەستەنى العاشقى رەانيماسيالاۋداعى، شالا تۋعان جانە اۋرۋ نارەستەلەردى قولداۋ ءۇشىن ارنايى تاماقتى قولدانۋداعى ۇزدىك تاجىريبەلەردى، رەسپيراتورلىق قولداۋدىڭ حالىقارالىق تاسىلدەرىن، جاڭا تۋعان نارەستەلەردىڭ ينفەكسيالارىمەن كۇرەستى، جوعارى قاتەرلى جۇكتىلىك كەزىندە باقىلاۋدىڭ پروگرەسسيۆتى تاكتيكاسىن جانە باسقا دا وزەكتى تاقىرىپتاردى تالقىلادى.
كونفەرەنسيانى «استانا مەديسينا ۋنيۆەرسيتەتى» كەاق جانە AYALA قايىرىمدىلىق قورىنىڭ قولداۋىمەن ق ر دەنساۋلىق ساقتاۋ مينيسترلىگىنىڭ باستاماسى بويىنشا قازاقستان اكۋشەر-گينەكولوگتارى مەن نەوناتولوگتارىنىڭ كونگرەسى ۇيىمداستىردى.
ق ر شتاتتان تىس باس نەوناتولوگى جانە قازاقستان اكۋشەر-گينەكولوگتارى مەن نەوناتولوگتارى كونگرەسىنىڭ پرەزيدەنتى بەكتۇرعان كارين بۇل كونفەرەنسيانىڭ وتكىزىلۋى بۇكىل ورتالىق ازيا وڭىرىندە نەوناتالدىق ءولىم-جىتىمدى ازايتۋعا ەلەۋلى ۇلەس قوسىپ، نەوناتولوگيا مەن پەريناتولوگياداعى حالىقارالىق جانە وڭىرلىك كوشباسشىلارمەن ىنتىماقتاستىقتى ودان ءارى جەمىستى ەتۋگە كومەكتەسەدى دەپ ەسەپتەيدى.
«ءقازىر قازاقستانداعى نەوناتالدىق قىزمەت پەريناتالدىق ورتالىقتاردىڭ، پەرزەنتحانالاردىڭ مىڭداعان دارىگەرلەرى مەن مەدبيكەلەرىن بىرىكتىرەدى، ولار مەديسينالىق كومەكتىڭ ساپاسىن جاقسارتۋ ءۇشىن ۇنەمى جۇمىس ىستەيدى. ساپا ءبىرىنشى كەزەكتە دارىگەرلەردىڭ دە، ورتا مەديسينالىق قىزمەتكەرلەردىڭ دە بىلىمىنە، تاجىريبەسى مەن داعدىلارىنا بايلانىستى. سوندىقتان جەتەكشى حالىقارالىق تاجىريبەشىلەردىڭ قاتىسۋىمەن كونفەرەنسيالار وتكىزۋ – ەلدەگى نەوناتولوگيانى دامىتۋ ءۇشىن وتە ماڭىزدى. ءبىز ءبىلىم بەرۋ باستامالارىمىزدى كوپتەگەن جىلدارى بويى قولداعانى ءۇشىن AYALA قايىرىمدىلىق قورىنا ريزاشىلىعىمىزدى بىلدىرەمىز»، - دەپ اتاپ ءوتتى بەكتۇرعان قارين.
UNICEF پەن ددۇ دەرەكتەرى بويىنشا قازاقستان تاۋەلسىزدىگىنىڭ العاشقى جىلدارىندا ءاربىر مىڭ نارەستەنىڭ 23ء-ى ءبىر ايعا دا جەتپەي قايتىس بولعان. ءقازىر جاعداي بىرنەشە ەسە جاقساردى – 2022 جىلدىڭ سوڭىندا نارەستە ءولىمى 5 پروميللەدەن تومەن بولدى. بۇل ەۋروپالىق وداق ەلدەرىنە وتە جاقىن جانە ورتالىق ازيا ەلدەرى اراسىنداعى ەڭ جاقسى كورسەتكىش. AYALA قايىرىمدىلىق قورىنىڭ نەگىزىن قالاۋشى جانە پرەزيدەنتى ايدان سۇلەيمەنوۆا ءدال وسى ۇزدىك حالىقارالىق ساراپشىلاردىڭ وزىق پراكتيكالىق بىلىمدەرىمەن الماسۋ قازاقستانعا نەوناتالدىق ءولىم-جىتىم كورسەتكىشىن ايتارلىقتاي تومەندەتۋگە قول جەتكىزۋگە كومەكتەسكەنىنە سەنىمدى.
«AYALA قايىرىمدىلىق قورى 14 جىلدان بەرى تەگىن شەبەرلىك سىنىپتارىن، سەمينارلاردى ۇيىمداستىرىپ كەلەدى. قازاقستاندىق نەوناتولوگتاردىڭ، مەدبيكەلەردىڭ، اكۋشەرلەردىڭ كاسىبي قۇزىرەتتەرىن دامىتۋعا كومەكتەسۋ ءۇشىن كونفەرەنسيالاردى قولدايدى. «AYALA اكادەمياسى» ونلاين-پلاتفورماسىن قازاق تىلىندەگى كەز كەلگەن ءموبيلدى قۇرىلعىدان قولجەتىمدى تەگىن بەينە كۋرستارىمەن بەلسەندى تۇردە دامىتۋدامىز. بىرنەشە جىلدان بەرى ءتۇرلى ەلدەردەن نەوناتولوگتار مەن نەوناتالدىق مەدبيكەلەردى بىرىكتىرە وتىرىپ، ونلاين-كلۋبتار وتكىزۋگە كومەكتەسەمىز. دارىگەرلەرىمىزدىڭ العان ءبىلىمى مەن ەڭ ۇزدىك حالىقارالىق تاجىريبەنى كۇندەلىكتى قولدانۋى قازاقستانداعى نەوناتالدىق مەديسينالىق كومەك رەتىندە ناعىز سەرپىلىسكە نەگىز بولدى»، - دەپ اتاپ ءوتتى ايدان سۇلەيمەنوۆا.
AstraZeneca، Baxter، MedConceptService، Drager جانە Acino كومپانيالارى دەمەۋشىلىك ەتكەن كونفەرەنسيادا Paris-Saclay ۋنيۆەرسيتەتتىك اۋرۋحانالارى (فرانسيا)، كليۆلەندتەگى Cleveland Clinic Children's and Pediatric Institute (اقش)، Santaros Klinikos ۆيلنيۋس ۋنيۆەرسيتەتى اۋرۋحاناسى، Sahlgrenska ۋنيۆەرسيتەتىنىڭ سيلۆيا پاتشايىم بالالار اۋرۋحاناسى (شۆەسيا)، پوزنان مەديسينا عىلىمدارى ۋنيۆەرسيتەتى (پولشا)، نەوناتالدىق ماسەلەلەر جونىندەگى رەسپۋبليكالىق پەريناتالدىق ورتالىق (وزبەكستان)، انا مەن بالانى قورعاۋ ۇلتتىق ورتالىعى (قىرعىزستان)، الماتى قالاسىنىڭ پەدياتريا جانە بالالار حيرۋرگياسى عىلىمي ورتالىعى، استانا مەديسينا ۋنيۆەرسيتەتى، تۇركىستان، وسكەمەن، قاراعاندى، قىزىلوردا، تاراز قالالارىنىڭ وبلىستىق پەريناتالدىق ورتالىقتارى جانە باسقا دا جەتەكشى قازاقستاندىق مەديسينالىق مەكەمەلەر سياقتى مەديسينالىق ورتالىقتاردىڭ مەديسينا عىلىمدارىنىڭ 26 كانديداتى، پروفەسسورلارى مەن ساراپشىلارى بايانداما جاسادى.