15 ماۋسىمدا ەلوردادان الاكول كۋرورتتى ايماعىنا «استانا-دوستىق» №257/258 باعدارى بويىنشا العاشقى پويىز جونەلتىلدى، دەپ حابارلايدى Almaty-akshamy.kz.
قازاقستان تەمىر جولى كومپانياسىنان ءمالىم ەتكەندەي، پويىز اپتاسىنا ەكى رەت: استانادان – جەكسەنبى، بەيسەنبى سايىن، دوستىق ستانسياسىنان – دۇيسەنبى جانە جۇما سايىن قاتىنايدى. پويىزعا 346 جولاۋشى سيادى.
باعداردىڭ استانادان الاكولگە دەيىنگى ۇزىندىعى – 1399 كم. پويىز جولدا 21 ساعات 45 مينۋت جۇرەدى. «تالگو» پويىزى – الاكولگە جەتۋدىڭ وڭتايلى جولى. ۆاگوندار اۋا جەلدەتكىش، بيودارەتحانا، روزەتكامەن جابدىقتالعان. جولاۋشىلار ءۇشىن vputi.kz مۋلتيمەديالىق ويىن-ساۋىق پورتالى قولجەتىمدى. پويىزدا ەرەكشە قاجەتتىلىگى بار ادامدار ءۇشىن «گراند» ساناتىنداعى ۆاگوندار، ۆاگون-بار جانە ۆاگون-مەيرامحانا قاراستىرىلعان. بيلەت قۇنى ۆاگون ساناتىنا قاراي 17 مىڭ تەڭگەدەن باستالادى.
ال الماتىدان الاكولگە دەيىن «تالگو» ۆاگوندارىنان قۇرالعان ەكى جولاۋشىلار پويىزى قاتىنايدى:
- №211/212 «الماتى-دوستىق» (346 جولاۋشى ورنى بار) كۇنارا: الماتىدان – جۇپ كۇندەرى، دوستىقتان – تاق كۇندەرى؛
- №253/254 «الماتى-دوستىق» (276 جولاۋشى ورنى بار) كۇنارا: الماتىدان – تاق كۇندەرى، دوستىقتان – جۇپ كۇندەرى.
الماتى مەن دوستىقتىڭ اراسى 846 كم جول، جولعا كەتەتىن ۋاقىت – 17 ساعات 35 مينۋت. بيلەت قۇنى 11 مىڭ تەڭگەدەن باستالادى.
«تالگو» پويىزدارىنىڭ ارنايى ورىندارىنا ەرەكشە قاجەتتىلىكتەرى بار جاندار ءۇشىن بيلەتكە 70% جەڭىلدىك قاراستىرىلعان. بيلەتتەردى كاسسادان نەمەسە https://bilet.railways.kz سايتى ارقىلى كوميسسياسىز ساتىپ الۋعا بولادى.
سونىمەن قاتار الاكول باعىتىندا جازعى مەزگىلدە 8 باعدار بويىنشا جولاۋشىلار پويىزدارى قاتىنايدى:
- №53/54 «استانا-دوستىق» پويىزى (تاسىمالداۋشى «جولاۋشىلار تاسىمالى» اق )؛
- №122/6941/6942/121 «استانا-دوستىق» پويىزى(جەكە تاسىمالداۋشى «ارايترانسكز» ج ش س)؛
- №221/222 «الماتى – دوستىق» پويىزى (تاسىمالداۋشى «جولاۋشىلار تاسىمالى» اق)؛
- №22/6941/6942/21 «الماتى – دوستىق» پويىزى (تاسىمالداۋشى «جولاۋشىلار تاسىمالى» اق)؛
- №337/338 «الماتى – دوستىق» پويىزى (جەكە تاسىمالداۋشى «Vagon Service Almaty» اق؛
- №457/458 «سەمەي – دوستىق» پويىزى (تاسىمالداۋشى «جولاۋشىلار تاسىمالى» اق)؛
- №459/460 «وسكەمەن – دوستىق» (تاسىمالداۋشى «جولاۋشىلار تاسىمالى» اق)؛
- №6941/6942 «اقتوعاي – دوستىق» قالا ماڭى پويىزى (تاسىمالداۋشى «جولاۋشىلار تاسىمالى» اق)