الماتىدا 20 جىلدان استام ۋاقىت بويى جوندەۋ جۇرگىزىلمەگەن تەررەنكۋر اباتتاندىرىلادى، دەپ حابارلايدى almaty-akshamy.kz
الماتىدا تەررەنكۋر ساياباق ايماعى سۋ ايدىنىنىڭ اينالاسىنداعى جالپى اۋدانى 3،4 گا ۋچاسكەنى رەكونسترۋكسيالاۋ باستالادى. بۇل ايماق تاتتىمبەت كوشەسى مەن دوستىق داڭعىلىنا جاقىن ماڭداعى شىعىس بولىكتە ورنالاسقان.
مۇندا كەڭ دەمالىس ايماعى، توعان بويىنداعى سەرۋەندەۋ جولى جانە وتپەلى كوپىر بار. ادەمى توعاننىڭ اۋماعىندا سۋدىڭ جانىندا ونەر كورسەتۋگە ارنالعان ساحنا بولادى. وعان قاراما-قارسى زاماناۋي اشىق امفيتەاتر ورنالاسادى.
تەررەنكۋرداعى ايگىلى روتوندا دا وزگەرەدى، ول 20 جىل ىشىندە مۇلدەم قاراۋسىز قالعان.
كەلۋشىلەردىڭ جايلىلىعى ءۇشىن جاڭا بالالار جانە سپورت الاڭدارى، ورىندىقتار مەن ۋرنالار، جارىقتاندىرۋ تىرەكتەرى ورناتىلادى. اۋدانى 19،6 مىڭ م2 ۋچاسكەنى كوگالداندىرۋ، 2،8 مىڭ م2 تروتۋار پليتالارىن توسەۋ جانە اۆتوسۋارۋ جۇيەسىن ەنگىزۋ بويىنشا جۇمىستار جوسپارلانعان.
رەكونسترۋكسيا اياسىندا توعاندى اباتتاندىرۋ دا قاراستىرىلعان، وسىعان بايلانىستى قازىرگى ۋاقىتتا سۋ جوق. جۇمىس اياقتالعاننان سوڭ سۋ بەرىلەدى. رەكونسترۋكسيا ماۋسىم ايىنىڭ باسىندا باستالىپ، اعىمداعى جىلدىڭ سوڭىنا دەيىن اياقتالادى.
جاڭارعان قوعامدىق كەڭىستىك ۋچاسكەنى الماتىلىقتار مەن قالا قوناقتارى ءۇشىن جايلى جانە تارتىمدى دەمالىس ايماعىنا اينالدىرادى.
ايتا كەتەرلىگى، تەررەنكۋرداعى دەنساۋلىق سوقپاعى 1974 جىلى سالىنعان. بۇل اۋماق جەكە مەنشىكتە بولدى جانە جوندەۋ جۇمىستارى 20 جىلدان استام ۋاقىت بويى جۇرگىزىلمەگەن. 2023 جىلى ۋچاسكە كوممۋنالدىق مەنشىككە قايتارىلدى، سودان كەيىن رەكونسترۋكسيالاۋ جونىندە جوبالاۋ-سمەتالىق قۇجاتتامانى ازىرلەۋ جۇمىستارى باستالدى.