الماتى تاۋلىك بويى جۇمىس ىستەيتىن كىتاپحانالار تاجىريبەسىن بەلسەندى تۇردە ەنگىزىپ وتىر.
ايتا كەتەيىك، ءبىر جىل بۇرىن، ماۋسىم ايىندا وتكەن ۇلتتىق قۇرىلتايدىڭ ەكىنشى وتىرىسىندا مەملەكەت باسشىسى قاسىم-جومارت توقايەۆ تاۋلىگىنە 24 ساعات جۇمىس ىستەيتىن كىتاپحانالار قۇرۋ تۋرالى باستاما كوتەرگەن بولاتىن.
الماتىنىڭ ەكى كىتاپحاناسى – جامبىل اتىنداعى قالالىق جاسوسپىرىمدەر كىتاپحاناسى مەن Alatau Creative Hub ورتالىعىنىڭ كىتاپحاناسى 2023 جىلعى قىركۇيەك ايىنان بەرى (2023-2024 وقۋ جىلى) وقىرمانداردى تاۋلىك بويى قابىلداپ كەلەدى. الماتىنىڭ مادەنيەت باسقارماسى بۇل ادىستەمەنىڭ وقۋشىلار، ستۋدەنتتەر، ماگيسترانتتار، سونداي-اق دوكتورانتتار اراسىندا ۇلكەن سۇرانىسقا يە ەكەنىن اتادى. وسىعان بايلانىستى مەگاپوليستىڭ اباي داڭعىلى، 141 مەكەنجايىندا ورنالاسقان تاعى ءبىر كىتاپحاناسى ەندى 24/7 رەجيمىندە جۇمىس ىستەيدى.
«ءقازىر الماتىدا ءۇش كىتاپحانا وقىرمانداردى 24 ساعات بويى قابىلدايدى. كەز كەلگەن ادام وزىنە ىڭعايلى ۋاقىتتا كەلە الادى. جاڭا جۇمىس فورماتى ەنگىزىلگەن سوڭ كەلۋشىلەر سانى دا ارتتى. ناقتىراق ايتساق، 2023 جىلعى قىركۇيەك ايىنان بەرى جامبىل اتىنداعى قالالىق جاسوسپىرىمدەر كىتاپحاناسىنا 27 650 ادام كەلسە، Alatau Creative Hub ورتالىعىنىڭ كىتاپحاناسى 28 مىڭ وقىرمانعا قىزمەت كورسەتكەن. جالپى الماتىلىقتار كىتاپ وقىعاندى جاقسى كورەدى. تەك قالالىق كىتاپحانالارداعى كورسەتكىشتەرگە توقتالساق، وقىرماندار جىل سايىن كەم دەگەندە ءۇش ميلليون رەت كەلىپ-كەتەدى»، – دەپ حابارلايدى الماتى قالاسىنىڭ مادەنيەت باسقارماسى.
ايتا كەتەيىك، الماتىدا 28 قالالىق كىتاپحانا جۇمىس ىستەيدى. ولاردىڭ 95%-ى جاڭعىرتۋدان ءوتتى: ماتەريالدىق-تەحنيكالىق بازا مەن كىتاپ قورى جاڭارتىلىپ، جايلى وقۋ زالدارى مەن ينتەرنەت-زالدار پايدا بولدى. سونداي-اق، الماتى كىتاپحاناشىلارى وقىرماندارعا قىزمەت كورسەتۋ ساپاسىن ارتتىرۋ ماقساتىندا العاش رەت وڭتۇستىك كورەيا، گەرمانيا جانە شۆەيسارياداعى ۇزدىك كىتاپحانالاردا تاعىلىمدامادان ءوتىپ كەلدى.
