الماتىنىڭ بوستاندىق اۋدانىندا تاۋلىك بويى اۋىر جاعدايداعى ازاماتتارعا مەديسينالىق كومەك كورسەتەتىن قالانىڭ جالعىز مەديسينالىق ۇيىمى — قالالىق پاللياتيۆتىك كومەك ورتالىعى جۇمىس ىستەپ تۇر، دەپ حابارلايدى aqshamnews.kz.
الماتى قالاسىنىڭ قوعامدىق دەنساۋلىق ساقتاۋ باسقارماسىنىڭ مالىمەتىنشە، بۇل مەكەمە قازاقستانداعى العاشقى حوسپيس رەتىندە 1999 جىلى ماۋسىم ايىندا اشىلعان.
ايتا كەتكەن ءجون، پاللياتيۆتىك كومەك — مامانداندىرىلعان ەمدەۋ مۇمكىندىگى شەكتەۋلى نەمەسە مۇمكىن ەمەس جاعدايدا اۋىرسىنۋدى جانە باسقا دا اۋرۋدىڭ بەلگىلەرىن جەڭىلدەتۋگە، ناۋقاس پەن ونىڭ وتباسىنا پسيحولوگيالىق، الەۋمەتتىك جانە رۋحاني قولداۋ كورسەتۋگە باعىتتالعان كومەك ءتۇرى.
قالالىق پاللياتيۆتىك كومەك ورتالىعى ديرەكتورىنىڭ ورىنباسارى ايسا وماروۆانىڭ ايتۋىنشا، اۋرۋحانا العاشقىدا اۋىر ونكولوگيالىق ناۋقاستارعا كومەك كورسەتۋ ءۇشىن اشىلعان. ويتكەنى بۇل ناۋقاستار كۇتىم مەن ارناۋلى ەم-دومدى قاجەت ەتتى.
ودان كەيىنگى جىلدارى ورتالىققا قاتەرلى ىسىك اۋرۋلارى، دەكومپەنساسيا ساتىسىنداعى باۋىر سيرروزى، اسقىنۋلارى بار قانت ديابەتى، تىنىس الۋ جانە دەكومپەنساسيا ساتىسىنداعى جۇرەك-قان تامىرلارى اۋرۋلارى، ينسۋلتتەن كەيىنگى زارداپتارى مەن اۋىر جاراقاتتارى بار ناۋقاستار جاتقىزىلا باستاعان.
ال 2019 جىلدان باستاپ حوسپيسكە قالالىق مەيىربيكەلىك اۋرۋحانا قوسىلدى.
— پاللياتيۆتىك كومەك ورتالىعىنىڭ نەگىزگى ماقساتى — ادامنىڭ ءومىرىنىڭ قيىن كەزەڭىندە قولداۋ كورسەتۋ، وسى كەزەڭدە ناۋقاستىڭ ءومىر ءسۇرۋ ساپاسىن جاقسارتۋ. جىل سايىن پاللياتيۆتىك كومەك پەن مەيىربيكەلىك كۇتىمگە مۇقتاج ناۋقاستاردىڭ سانى ارتىپ كەلەدى. بۇل حالىقتىڭ ءومىر ءسۇرۋ ۇزاقتىعىنىڭ جانە ەگدە جاستاعى ادامدار سانىنىڭ ارتۋىنا بايلانىستى. جاسى مەن سوزىلمالى اۋرۋلاردىڭ بولۋىنا بايلانىستى ولار سىرتقى كۇتىمدى قاجەت ەتەدى، — دەيدى مامان.
تەگىن مەديسينالىق كومەكتىڭ كەپىلدىك بەرىلگەن كولەمى شەڭبەرىندە ناۋقاستارعا كومەك كورسەتەتىن حوسپيس بۇگىنگى كۇنى ورتالىق قالالىق كلينيكالىق اۋرۋحانانىڭ جانىنداعى (بايزاقوۆ كوشەسى، 295) قالالىق كلينيكالىق جۇقپالى اۋرۋلار اۋرۋحاناسىنىڭ عيماراتىندا ۋاقىتشا ورنالاسقان.
ورتالىق 180 توسەك-ورىنعا ەسەپتەلگەن جانە وندا 200-گە جۋىق ادام جۇمىس ىستەيدى. ءپاللياتيۆتى كومەك شەڭبەرىندە قالالىق ونكولوگيالىق ورتالىقتا ەمدەلمەيتىن قاتەرلى ىسىك دياگنوزى بار ادامدارعا مەديسينالىق-پسيحولوگيالىق كومەك كورسەتۋ بويىنشا ءحوسپيستىڭ كوشپەلى ءموبيلدى بريگاداسى دا بار.
ايسا وماروۆانىڭ ايتۋىنشا، ءپاللياتيۆتى كومەك ورتالىعى الداعى ۋاقىتتا جاڭا عيماراتقا كوشەدى. مەگاپوليستە كومەكتىڭ وسى ءتۇرىن قاجەت ەتەتىن ادامداردىڭ ارتۋىنا بايلانىستى زاماناۋي پاللياتيۆتىك كومەك ورتالىعىنىڭ قۇرىلىسى جوسپارلانعان.
وندا اۋىر ساناتتاعى ناۋقاستار كومەك الۋى ءۇشىن بارلىق جاعداي جاسالماق: ەكى ورىندى پالاتالار، كەڭ دالىزدەر، بەيىمدەلگەن سانيتارلىق توراپتار سالىنىپ، قاجەتتى مەديسينالىق قۇرال-جابدىق الىنادى.
— ورتالىققا ناۋقاستار جوسپارلى تۇردە قالالىق ەمحانالار مەن كوپسالالى ستاسيونارلاردىڭ جولداماسى بويىنشا جاتقىزىلادى. ولارعا تەگىن مەديسينالىق كومەكتىڭ كەپىلدىك بەرىلگەن كولەمى شەڭبەرىندە قىزمەت كورسەتىلەدى. حوسپيستە اقىلى كومەك الۋعا دا بولادى. ناۋقاستاردىڭ ورتالىقتا جاتۋىنىڭ ناقتى بەلگىلەنگەن كۇنى جوق، كومەك الۋ ۋاقىتى — ولاردىڭ جاعدايىنا بايلانىستى شەشىلەدى. ورتالىقتا ەمدەلەتىن ادامداردىڭ اس-اۋقاتى ولاردىڭ دياگنوزىنا بايلانىستى بەرىلەدى. ديەتولوگ مەيىربيكە دارىگەردىڭ كەڭەسى بويىنشا كۇندەلىكتى اركىمگە جەكە ءمازىر ازىرلەيدى. ودان بولەك ەم الۋشىلار تۋعان-تۋىستارىمەن بەلگىلەنگەن ۋاقىتتا كەزدەسە الادى، — دەدى ايسا وماروۆا.
ەلىمىزدە اشىلعان العاشقى حوسپيستە ايىقپاس سىرقاتقا شالدىققان ازاماتتارعا، تراحەوستوميا (جاساندى تىنىس الۋ جولى) جاسالعان ادامدارعا، ءزار شىعارۋ كاتەتەرى جانە باسقا دا ارنايى كومەكتى قاجەت ەتەتىن ناۋقاستارعا كۇتىم جاسالادى.
سونىمەن قاتار مەديسينا قىزمەتكەرلەرى ورتالىقتا ەم الىپ جاتقان جالعىزباستى پاسيەنتتەردىڭ تۋىستارىن ىزدەۋمەن اينالىسادى.
ولاردىڭ جوعالعان قۇجاتتارىن، سونىڭ ىشىندە جەكە كۋالىكتەرىن قالپىنا كەلتىرۋگە جاردەم بەرەدى جانە حوسپيستەن شىعارىلعاننان كەيىن الەۋمەتتىك قىزمەت ورتالىقتارىنا (قارتتار ۇيلەرى) ورنالاستىرادى.
ءپاللياتيۆتى كومەك ورتالىعىندا 25 جىلداي جۇمىس ىستەپ كەلە جاتقان مامان — ىشكى اۋديت جانە پاسيەنتتى قولداۋ قىزمەتىنىڭ باسشىسى گالينا كوتوۆانىڭ ايتۋىنشا، ورتالىقتاعى كۇتىمنەن كەيىن جاعدايى جاقساراتىن ناۋقاستار دا جوق ەمەس.
— قالالىق ءپاللياتيۆتى كومەك ورتالىعىندا جۇمىس ىستەۋ قيىن دەي المايمىن، ءبىراق وڭاي دا ەمەس. اسىرەسە، مورالدىق تۇرعىدا. ءاردايىم ناۋقاستارعا بارىنشا كومەك كورسەتىپ، وڭالىپ، ءتاۋىر بولىپ كەتسە دەپ تىلەيمىز. ولار ءبىزدىڭ ورتالىقتان ءوز اياعىمەن ۇيلەرىنە قايتسا دەيمىز. ءبىراق پاسيەنتتىڭ اۋىر جاعدايىنا بايلانىستى بۇل مۇمكىن بولا بەرمەيدى. دەگەنمەن بىزدە ەم العان ادامداردىڭ جاعدايى جاقسارعان كەزدەر دە بار. ولار ورتالىقتان شىققاننان كەيىن وزگە ەمحانالاردا ەمىن جالعاستىرادى. كەي ناۋقاستاردى امبۋلاتوريالىق ەم الۋعا ۇيگە جىبەرەمىز. جالپى ورتالىقتا ەم العان ازاماتتاردان ءجيى العىس الامىز، تۋعان-تۋىستارى ريزاشىلىعىن ءبىلدىرىپ جاتادى، — دەيدى گالينا كوتوۆا.