الماتىداعى مەيرامحانالاردىڭ بىرىندە داياشىنى ۇرعان ازامات ۇستالدى

ول مەدەۋ اۋداندىق پوليسيا بولىمىنە جاۋاپ الۋ ءۇشىن جەتكىزىلدى.

قالا پوليسەيلەرى الماتىداعى مەيرامحانالاردىڭ بىرىندە داياشىنىڭ بەتىنەن جۇدىرىقپەن ۇرعان ەر-ازاماتتى ۇستادى، دەپ حابارلايدى Almaty-akshamy.kz. 

قالالىق پد باسشىسىنىڭ ورىنباسارى رۋستام ءابدىراحمانوۆتىڭ ايتۋىنشا، داياشىنى ۇرعان ازاماتتىڭ كىم ەكەنى انىقتالعان.  

«ۋ. ەسىمدى 29 جاستاعى ەر-ازامات قولعا ءتۇستى. قازىرگى تاڭدا ول مەدەۋ اۋداندىق پوليسيا بولىمىنە جاۋاپ الۋ ءۇشىن جەتكىزىلدى. كىنالى ازامات جاۋاپكەرشىلىككە تارتىلادى. وقيعا بويىنشا «بۇزاقىلىق» بابىمەن سوتقا دەيىنگى تەرگەۋ امالدارى جۇرگىزىلۋدە. سوت-مەديسينالىق ساراپتاماسىنىڭ ناتيجەسىندە پروسەسسۋالدىق شەشىم شىعارىلادى»، – دەيدى پوليسيا وكىلدەرى.

بۇعان قوسا، پوليسەيلەر كىنالى ازاماتتىڭ كەشىرىم سۇراعانىن جەتكىزدى. 

الماتىداعى مەيرامحانالاردىڭ بىرىندە ورىن العان بۇل جاعدايدى الەۋمەتتىك جەلى پايدالانۋشىلارى قىزۋ تالقىلاعان بولاتىن. قازاقستاندىقتار داياشىنى ۇرعان ازامات جاۋاپكەرشىلىككە تارتىلۋ كەرەك دەگەن پىكىر بىلدىرگەن.  

«25 شىلدە كۇنى 10:00-دە مەيرامحاناعا تاڭعى اس ىشۋگە كەلگەنمىن. داياشى ۇستىمە بايقاۋسىزدا كوفە توگىپ الدى. سول ءۇشىن مەن ونى ۇردىم. قاتتى ۇرعان جوقپىن. ءبىراق بۇل دۇرىس ەمەس ەكەنىن ءتۇسىنىپ تۇرمىن. كەشىرىم سۇرايمىن»، – دەيدى ايىپتالۋشى.