قازىرگى كەزدە ەكى كوشەنى ۇزارتۋ جۇمىستارى جالعاسىپ جاتىر.
الماتى قالالىق موبيلدىلىك باسقارماسى باسشىسىنىڭ ورىنباسارى ەرنۇر ابجاحان بريفينگ بارىسىندا قالاداعى كوشەلەردىڭ قالاي ۇزارتىلىپ جاتقانىن ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سپيكەردىڭ ايتۋىنشا، تولە بي كوشەسى ياسساۋي كوشەسىنەن قالا شەكاراسىنا دەيىن باتىس باعىتتا 4،5 شاقىرىمعا ۇزارتىلماق. جول قۇرىلىسىنا دايىندىق جۇمىستارى مەن ماتەريالداردى ساتىپ الۋ جۇمىستارى جۇرگىزىلىپ جاتىر.
«تولە بي كوشەسىن ۇزارتۋ جۇمىستارى بيىل عانا باستالدى. 270-كە جۋىق جەر ۋچاسكەسى جولدىڭ ۇستىندە تۇر. وسى ۋچاسكەلەردى ساتىپ الۋ بويىنشا اۋقىمدى جۇمىس كۇتىپ تۇر. تەك سودان كەيىن عانا ينجەنەرلىك جەلىلەردى قايتا جاڭعىرتۋ، جۇمىستارى باستالادى. سوعان قاراماستان، «الما سيتي» تۇرعىن ءۇي كەشەنىنىڭ تۇرعىندارىنا قولايلى بولۋ ءۇشىن بيىلعى جىلى الاتاۋ داڭعىلىنان شىعىس باعىتتاعى جولدى ءجۇنىسوۆ كوشەسىنە دەيىن قوسىپ، كولىك قولجەتىمدىلىگىن قامتاماسىز ەتۋدى جوسپارلاپ وتىرمىز. بۇل جەرگىلىكتى تۇرعىندارعا ىڭعايلى بولماق. بولاشاقتا بۇل جول التى جولاققا دەيىن كەڭەيتىلىپ، نەگىزگى جولعا اينالادى»، - دەدى ول.
باسقارما وكىلىنىڭ ايتۋىنشا، جەر ۋچاسكەلەرىن ساتىپ الۋ شامامەن 2023-2024 جىلدارعا جوسپارلانىپ وتىر.
سونداي-اق، سپيكەر اۋەزوۆ كوشەسىنىڭ گوگول كوشەسىنەن رايىمبەك داڭعىلىنا دەيىنگى ۇزىندىعى 0،4 شاقىرىم بولىگى پايدالانۋعا بەرىلگەنىن ءمالىم ەتتى.
قازىرگى ۋاقىتتا جالپى ۇزىندىعى 6،2 شاقىرىم بولاتىن ەكى كوشەنى (اباي داڭعىلى، ساين كوشەسى) ۇزارتۋ جۇمىستارى جالعاسىپ جاتىر.
«اباي داڭعىلىنىڭ ۇزارتىلعان بولىگىندەگى اسپالى جاياۋ جۇرگىنشىلەر وتكەلدەرىن اباتتاندىرۋ جۇمىستارىن تامىز ايىنىڭ سوڭىنا دەيىن اياقتاۋدى جوسپارلاپ وتىرمىز»، - دەدى ەرنۇر ابجاحان.
سونىمەن قاتار، ول رىسقۇلوۆ داڭعىلىنان موڭكە بي كوشەسىنە دەيىنگى ساين كوشەسى 3،2 شاقىرىمعا دەيىن ۇزارتىلاتىنىن جەتكىزدى. قۇرىلىس-مونتاج جۇمىستارى 40 پايىزعا ورىندالدى. جۇمىستى تولىق اياقتاۋ 2023 جىلعا جوسپارلانعان.