الماتىدا جاڭا ءبىلىم بەرۋ جوباسى – جاساندى ينتەللەكت مەكتەبى ءوز جۇمىسىن المالى اۋدانىنداعى كوميۋنيتي-ورتالىق بازاسىندا باستايدى، دەپ حابارلايدى aqshamnews.kz
بۇل باستاما الماتى قالاسى جاستار ساياساتى باسقارماسىنىڭ قولداۋىمەن Qazaq IT Community سەرىكتەستىگى اياسىندا جۇزەگە اسىرىلىپ، جاستاردى دامىتۋعا باعىتتالعان.
جوبا اياسىندا الماتىلىق جاستار جاساندى ينتەللەكت تەحنولوگيالارىن تەگىن ۇيرەنىپ، زاماناۋي AI-قۇرالدارىن مەڭگەرىپ، ولاردى وقۋ، زەرتتەۋ جانە بولاشاق كاسىبي قىزمەتىندە قولدانا الادى. وقۋ باعدارلاماسى ماشينالىق وقىتۋ الگوريتمدەرىن، نەيروندىق جەلىلەردىڭ نەگىزدەرىن، دەرەكتەرمەن جۇمىس ىستەۋدى جانە AI-دى ءتۇرلى سالالاردا پايدالانۋدى پراكتيكالىق تۇردە وقىتۋدى قامتيدى.
«جاساندى ينتەللەكتتىڭ دامۋى – جاي عانا ترەند ەمەس، بۇل قازاقستاننىڭ الەمدىك تەحنولوگيالىق ارەنادا بەلسەندى ويىنشىعا اينالۋىنا اپاراتىن بولاشاقتىڭ كىلتى. المالى اۋدانىنداعى كوميۋنيتي-ورتالىقتا جي مەكتەبىنىڭ اشىلۋى – الماتىدا مىقتى IT-قوعامداستىق قۇرۋ جولىنداعى ماڭىزدى قادام. بۇل جەردە جاستار زاماناۋي تەحنولوگيالاردى مەڭگەرىپ، وزىق بىلىمگە قول جەتكىزەدى. ءبىز بۇل ءبىلىمنىڭ جاستارعا تەك بولاشاعى زور ماماندىقتاردى يگەرۋگە عانا ەمەس، سونىمەن قاتار يننوۆاسيالىق شەشىمدەردى جاساۋعا كومەكتەسەتىنىنە سەنىمدىمىز»، – دەپ اتاپ ءوتتى Qazaq IT Community نەگىزىن قالاۋشى اسەم بولاتجان.
ايتا كەتۋ كەرەك، الماتىدا جاستارعا ارنالعان 11 كوميۋنيتي-ورتالىق جۇمىس ىستەيدى، ولار قالانىڭ ءار اۋدانىندا ورنالاسقان. ءاربىر كوميۋنيتي-ورتالىق – بۇل جاستاردى قولداۋعا باعىتتالعان كرەاتيۆتى قوعامدىق كەڭىستىك. مۇندا مەملەكەتتىك باعدارلامالار بويىنشا كەڭەس بەرۋ، پسيحولوگيالىق جانە زاڭگەرلىك كومەك، NEET-جاستارعا قىسقا مەرزىمدى كۋرستار ارقىلى زاماناۋي ماماندىقتاردى ۇيرەتۋ جانە جۇمىسپەن قامتۋ شارالارى قاراستىرىلعان.
«مەن جاساندى ينتەللەكت تەحنولوگيالارىنا بۇرىننان قىزىعاتىنمىن، ءبىراق نەدەن باستارىمدى بىلمەدىم. وسى مەكتەپتىڭ ارقاسىندا مەن زاماناۋي AI-قۇرالدارىنا قول جەتكىزىپ، ولاردى وقۋىمدا قولدانا باستادىم. بۇل – الماتى جاستارى ءۇشىن كەرەمەت مۇمكىندىك!» – دەپ ءوز اسەرىمەن العاشقى قاتىسۋشىلاردىڭ ءبىرى، ستۋدەنت ايبەك سارسەنوۆ ءبولىستى.
وقىتۋعا جازىلۋ ءۇشىن جاستار المالى اۋدانىنداعى كوميۋنيتي-ورتالىققا بايتۋرسىن ۇلى 22ك1 مەكەنجايى بويىنشا جۇگىنە الادى.