قاڭتارداعى تارتىپسىزدىك كەزىندە الماتىداعى Kaspi Bank فيليالىن توناعان كۇدىكتىلەر ۇستالدى. بۇل تۋرالى ق ر ءىىم تەرگەۋ دەپارتامەنتىنىڭ باسشىسى سانجار ءادىلوۆ ايتتى، دەپ حابارلايدى almaty-akshamy.kz
«پوليسيانىڭ جەدەل مۇمكىندىگىمەن قاتار، بۇل قىلمىستاردى اشۋعا سانالى ازاماتتاردىڭ بەلسەندى كومەگى دە ىقپال ەتتى. ولار كەڭىنەن ءتۇسىندىرۋ جۇمىسىنىڭ ناتيجەسىندە وقيعا كەزىندە تۇسىرىلگەن بەينەماتەريالداردى ۇسىندى. وسىنداي ۆيدەولاردىڭ ءبىرىنىڭ ارقاسىندا الماتى قالاسىندا ءبىر توپ جاس جىگىتتتىڭ «لۋناپارك» بالالار ويىن-ساۋىق ورتالىعىنان ۇرلانعان تەلەديدارلار مەن باسقا دا تۇرمىستىق تەحنيكانى اۆتوكولىككە تيەپ ۇرلاعانى انىقتالدى. باسقا ۆيدەودا الماتى قالاسىنداعى Kaspi Bank فيليالىنا شابۋىل جاسالعانى كورىندى. وندا ءبىر توپ ادام قىلمىس ورنىندا، ياعني اينالاسىنداعىلارعا جانە ءوتىپ بارا جاتقان كولىكتەرگە نازار اۋدارماي تونالعان مۇلىكتى بولىسكەن»، - دەدى سانجار ءادىلوۆ ورتالىق كوممۋنيكاسيالار قىزمەتىندە.
وسى ورايدا ول ەكى جاعدايدا دا كۇدىكتىلەر انىقتالىپ، قاماۋعا الىنعانىن ايتتى.
«ازاماتتار ۇسىنعان بەينەماتەريالدار قىلمىسكەرلەردى اشكەرەلەۋگە كومەكتەسەدى جانە زاتتاي دالەلدەمە رەتىندە پايدالانىلادى»، - دەدى تەرگەۋ دەپارتامەنتىنىڭ باسشىسى.