الماتىداعى جۇقپالى اۋرۋحانالار ناۋقاسقا تولى

الماتىدا 29 كوۆيدتى اۋرۋحانادا 1788 ادام بار

بۇل تۋرالى الماتى قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى لاۋرا مىرزاعالي وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسى كەزىندە مالىمدەدى، دەپ حابارلايدى Almaty-akshamy.kz.

ل. مىرزاعالي الماتىدا 29 قىركۇيەكتەگى جاعداي بويىنشا كوروناۆيرۋس ينفەكسياسىن جۇقتىرعان 167 710 ناۋقاس تىركەلگەنىن حابارلادى. سونىڭ ىشىندە اۋرۋدىڭ بەلگىلەرى بار 145 009 ادام، سيمپتومسىز 22 701 ناۋقاس، 2372 انىقتالماعان پنيەۆمونيا. 

«سوڭعى تاۋلىكتە كوروناۆيرۋس ينفەكسياسىن جۇقتىرعان 426 ناۋقاس تىركەلدى. سونىڭ ىشىندە 408 اۋرۋ بەلگىلەرى بار جانە 18 بەلگىلەرى جوق. تاۋلىكتىك ءوسىم 0،2% بولدى. سونىمەن قاتار، جۇقتىرعانداردىڭ 89-ى زەينەتكەرلەر، 57ء-سى مەكتەپ وقۋشىلارى، 9-ى ستۋدەنتتەر، ەكەۋى بالاباقشاعا باراتىن بالالار، تاعى 20-سى ۇيىمداستىرىلماعان بالالار»، - دەدى ل. مىرزاعالي. 

قدب وكىلى اۋرۋدىڭ تومەندەۋىنە قاراماستان، ءقاۋىپتى ىندەتتىڭ ءالى سەيىلمەگەنىن اتاپ ءوتتى. سەبەبى جۇقپالى اۋرۋلار اۋرۋحانالارى ءالى دە ناۋقاسقا تولى.  بۇگىنگى كۇنى 1788 ادام اۋرۋحاناعا جاتقىزىلدى، ونىڭ ىشىندە 53 بالا. پاسيەنتتەردىڭ 71ء-ى وتە اۋىر، 855ء-ى اۋىر، 862ء-سى ورتاشا اۋىر. قالادا بارلىعى 5 230 توسەك-ورىن ورنالاستىرىلعان. 

«رەانيماسيا بولىمىندە 179 الماتىلىق بار، تاعى 35 ادام ۆەنتيلياتورعا قوسىلعان، 86 ادام ءينۆازيۆتى ەمەس جەلدەتكىشتە، 51 ادام جوعارى اعىندى قوندىرعىلارعا قوسىلعان»، - دەپ جالعاستىردى ل. مىرزاعالي.

بۇگىندە 4448 پاسيەنت امسك مەن تەلەمەديسينا ورتالىعىنىڭ ءموبيلدى توپتارىنىڭ باقىلاۋىندا ۇيدە جاتىر، ولاردىڭ 159-ى سيمپتومسىز، 4190-ى جەڭىل، 99-ى ورتاشا اۋىرلىقتا.  ناۋقاستاردىڭ جالپى سانىنان 598-ى - جۇقپالى اۋرۋلار اۋرۋحاناسىنان ءارى قاراي باقىلاۋ جانە وقشاۋلاۋ ءۇشىن شىعارىلعان ازاماتتار.