الماتىداعى «جەدەل شتاب» ستۋدەنتتەرگە جاتاقحانا تاۋىپ بەرەدى

بۇگىننىڭ وزىندە 17 ستۋدەنت جاتاقحاناعا ورنالاستى

الماتىدا جاتاقحاناعا مۇقتاج ستۋدەنتتەرگە ارنالعان «جەدەل شتاب» اشىلدى، دەپ حابارلايدى Almaty-akshamy.kz  «حابار 24» تەلەارناسىنا سىلتەمە جاساپ. 

ول ساتپايەۆ ۋنيۆەرسيتەتىنىڭ ەكىنشى جاتاقحاناسىندا ورنالاساقان. وعان الماتىعا وقۋعا تۇسكەن كەز كەلگەن ستۋدەنت نەمەسە ولاردىڭ اتا-اناسى حابارلاسا الادى. شتاب وكىلدەرى ءار ستۋدەنتتىڭ ءبىلىم الاتىن ۋنيۆەرسيتەتىنە حابارلاسىپ، ولارعا جاتاقحانادان ورىن بەرىلۋىن قاداعالايدى. وعان دەيىن ەكىنشى جاتاقحانادا ەكى كۇن تۇرا الادى. بۇل جۇمىسقا الماتىنىڭ بارلىق جوعارى وقۋ ورنى اتسالىسادى.

جەدەل شتاب تاۋلىگىنە 100-گە دەيىن ستۋدەنتتى قابىلداۋعا دايىن. بۇگىننىڭ وزىندە 17 ستۋدەنت جاتاقحاناعا ورنالاستى. شتاب جۇمىسىمەن عىلىم جانە جوعارى ءبىلىم ءمينيسترى ساياسات نۇربەك تانىسىپ، ستۋدەنتتەرمەن كەزدەستى. مينيستر كەلەسى جىلدان باستاپ كوپ بالالى جانە مۇقتاج وتباسىلاردان شىققان ستۋدەنتتەرگە شاكىرتاقىعا قوسىمشا 50-60 مىڭ تەڭگە قاراجات قاراستىرىلاتىنىن ايتتى. بۇل كومەك ستۋدەنتتەردىڭ پاتەر نەمەسە جاتاقحانا جالداپ تۇرۋى ءۇشىن بەرىلەدى.

«ەندى كەز كەلگەن جوعارعى وقۋ ورنى بىزدەن ليسەنزيا نەمەسە رۇقسات الۋ كەزىندە جاڭا ماماندىق اشۋ ءۇشىن ارنايى شارت، تالاپتار قويىلادى. 100 ادامدى قابىلداساڭىز، وسى باعدارلامادا وندا 100 جاتاقحانا ورىنداردى تالاپ ەتەمىز ءبىز. سوندىقتان شارتتار كۇشەيەدى. ارنايى قارجى ورتالىعىمەن بىرىگىپ، باعدارلاما پىسىقتالادى. 2026 جىلعا دەيىن 70-80 پايىز قاجەتتىلىكتى جابۋعا تىرىسامىز. 2029جىلعا قاراي 100 پايىز وسى ماسەلەنى شەشۋگە تىرىسامىز»، - دەيدى ق ر عىلىم جانە جوعارى ءبىلىم ءمينيسترى ساياسات نۇربەك.