بۇگىن الماتى قالاسى الاتاۋ اۋدانىنىڭ «تەرەكتى» شاعىن اۋدانىندا ينجەنەرلىك جەلىلەردىڭ قۇرىلىسى باستالدى. 66 كم سۋمەن جابدىقتاۋ جانە سۋ بۇرۋ جەلىلەرى سالىنادى. قازىرگى ۋاقىتتا مارتوك، تاستوبە جانە تۇيەمويناق كوشەلەرىندە جۇمىستار جۇرگىزىلىپ جاتىر، دەپ حابارلايدى Almaty-akshamy.kz.
قۇرىلىس جۇمىستارىن 2024 جىلدىڭ قاراشا ايىندا اياقتاپ، جوبانى پايدالانۋعا بەرۋ جوسپارلانعان. وسىلايشا، «تەرەكتى» شاعىن اۋدانىنىڭ 7 مىڭنان استام تۇرعىنى ورتالىق سۋ قۇبىرى جانە كارىز جەلىلەرىمەن قامتاماسىز ەتىلەدى.
بيىل تامىز ايىنىڭ سوڭىنا دەيىن «راحات-مادەنيەت» شاعىن اۋدانى بويىنشا 131،7 كم ينجەنەرلىك جەلىلەردىڭ قۇرىلىسى باستالادى. قازىرگى كەزدە قۇرىلىس جۇمىستارىنا تەحنيكالىق دايىندىق جۇرگىزىلۋدە، ول 2024 جىلدىڭ جەلتوقسان ايىنا دەيىن جالعاسادى. جوبانى ىسكە اسىرۋ بارىسىندا 14 مىڭنان استام تۇرعىن ورتالىق سۋ قۇبىرى جانە كارىز جەلىلەرىمەن قامتاماسىز ەتىلەدى.
«تاپسىرىس بەرۋشى رەتىندە جوبالاردا جۇمىس اياقتالعان سوڭ شۇڭقىردىڭ الدىن الۋ ءۇشىن سىعىلمايتىن توپىراقپەن قايتا تولتىرۋدى، ال بۇرىن اسفالتتالعان كوشەلەر بويىنشا جول توسەمىن قالپىنا كەلتىرۋدى قاراستىردىق. جەلىلەر قۇرىلىسى اياقتالعان كەزدە جول-قۇرىلىس جۇمىستارى جۇرگىزىلەدى. وسىعان بايلانىستى كولىك قوزعالىسىندا ۋاقىتشا قولايسىزدىقتار تۋىنداۋى مۇمكىن. بۇل جۇمىس ءبىزدىڭ تۇراقتى باقىلاۋىمىزدا بولادى»، - دەدى الاتاۋ اۋدانىنىڭ اكىمى ازامات قالدىبەكوۆ.
اۋدان اكىمدىگى الاتاۋ اۋدانىنداعى رەتسىز قۇرىلىستارعا بايلانىستى الماتىعا قوسىلعانعا دەيىن دە جەكە ۇيلەر ورتالىق كارىزسىز سالىنعانىن ايتتى. جەكە سەكتورداعى سۇيىق قالدىقتار اۋلاداعى سەپتيكتەرگە قوسىلىپ، توپىراق پەن جەر استى سۋىن لاستايدى، ولاردىڭ دەڭگەيىن جوعارىلاتادى.
«سونىڭ ناتيجەسىندە كەي جەردە جەر استى سۋى ۇنەمى جەر بەتىنە شىعادى. مۇنى شەشۋ ءۇشىن 2023 جىلى رەسپۋبليكالىق بيۋدجەتتەن كارىز جەلىلەرىن سالۋعا قاراجات ءبولىندى. ءقازىر ىسكە اسىرىلىپ جاتقان جوبا ازىرلەندى. جەكە سەكتوردا جاڭا جەلىلەردى سالۋ – قالا بيلىگى الدىنداعى باسىم مىندەتتىڭ ءبىرى»، - دەدى ازامات قالدىبەكوۆ.