الماتىداعى بوتانيكالىق باققا اققۋلار ورالدى

اققۋلار كولدە ەمىن-ەركىن ءجۇزىپ ءجۇر.

حايۋاناتتار باعىنىڭ جىلى پاۆيلونىندا قىستاپ شىققان اققۋلار الماتى بوتانيكالىق باعىنداعى كولىنە ورالدى، دەپ حابارلايدى اlmaty-akshamy.kz.

سۋ بەتىندە جۇزگەن قوس اققۋدىڭ ۆيدەوسى باقتىڭ جەلىدەگى پاراقشاسىنا شىقتى. اققۋلار باقتتاعى كولىنە 4 جىل بۇرىن قونىستانعان بولاتىن. اققۋلار وتە ساق بولعانىمەن، قالا تۇرعىندارىنان قورىقپايدى. قۇستار جۇبىمەن عانا جۇرەدى. جابايى تابيعاتتا 25 جىلعا دەيىن ءومىر سۇرەدى. سۇلۋلىقتىڭ، ماحابباتتىڭ سيمۆولىنا اينالعان پاڭ اققۋلاردىڭ جانىندا جۇبى اجىراماي، بىرگە ءجۇزىپ جۇرگەن ۇيرەكتەردى دە كورۋگە بولادى. سونىمەن بىرگە، بوتانيكالىق باقتىڭ ۇجىمى اققۋلار مەن بالىقتاردى تاماقتاندىرۋعا تىيىم سالىنعانىن حابارلادى.

«بوتانيكالىق باقتاعى بالىقتار مەن اققۋلاردى كۇتىپ-باپتاۋ مەن قورەكتەندىرۋگە ارنايى جالدانعان كاسىپقويلار كومپانياسى جاۋاپتى. بۇل رەتتە كۇندەلىكتى نورماسى بار قاتاڭ ديەتا ەسەپتەلگەن. ەسىڭىزدە بولسىن، نان، پەچەنە، چيپسى سياقتى قاجەتسىز تاعامدار اققۋلار مەن بالىقتاردى ارتىق سالماققا، اشىتۋعا، اسقازاننىڭ بۇزىلۋىنا دەنساۋلىعىنىڭ ناشارلاۋىنا اسەر ەتۋى مۇمكىن. وسىمدىكتەرگە عانا ەمەس، ءبىزدىڭ ءۇي جانۋارلارىنا دا قامقور بولايىق»، - دەپ ەسكەرتتى بوتانيكالىق باقتىڭ ۇجىمى.