اتالعان الەۋمەتتىك ورتالىققا كۇنىنە جيىرمادان اسا ادام كەلەدى.
الماتىداعى «باقىتتى وتباسى» ورتالىعىندا اشىق ەسىك كۇنى ءوتتى. المالى اۋدانىندا ورنالاسقان الەۋمەتتىك مەكەمەدە كوپ بالالى انالار مەن الەۋمەتتىك از قامتىلعان وتباسىلارعا مەمەلەكەتتىك قىزمەتكەرلەر كەڭەس بەردى، دەپ حابارلايدى Almaty-akshamy.kz Almaty.tv سىلتەمە جاساپ.
ارنايى ۇيىمداستىرىلعان شاراعا پروكۋراتۋرا وكىلدەرى مەن تۇرعىن ءۇي ساياساتى باسقارماسىنىڭ ماماندارى قاتىسىپ، كەلۋشىلەردىڭ كوپتەگەن ساۋالدارىنا جاۋاپ بەرىپ، ماسەلەنى شەشۋ جولدارىن كورسەتكەن.
«كەلگەن انالاردىڭ ااك-كە، قوسىمشا جاردەماقىعا، بالالاردىڭ ىستىق تاماعىنا قاتىستى ساۋالدارى كوپ. سوندىقتان ءبىز بۇگىن اشىق ەسىك كۇنىن ۇيىمداستىردىق. ءبىز كوپ بالالى انالار مەن مۇقتاج وتباسىلاردىڭ بارىنشا دۇرىس، شىنايى اقپار العانىن قالايمىز»، - دەدى المالى اۋدانى «باقىتتى وتباسى» ورتالىعىنىڭ ديرەكتورى ىڭكار ءجاڭاادىل قىزى.
اتالعان الەۋمەتتىك ورتالىققا كۇنىنە جيىرمادان اسا ادام كەلەدى ەكەن. ودان وزگە، بۇل جەردە شاشتاراز، اسپاز، تىگىنشى سەكىلدى قوعامعا كەرەكتى ماماندىقتارعا ۇيرەتەدى. ەگەر جاقسى يگەرىپ كەتسە، جۇمىس تا تاۋىپ بەرۋگە بولادى دەيدى ماماندار. «باقىتتى وتباسى» ورتالىعى قوعامداعى وزەكتى ماسەلەلەردى وڭتايلى شەشىپ، مۇقتاج وتباسىلاردىڭ ءومىر ءسۇرۋ ساپاسىن ارتتىرۋعا باعىتتالعان.
«ءقازىر مەن ءوزىم سەكىلدى جاعدايداعى انالارعا كەڭەس بەرەمىن. مەنىڭ بالام دا ەرەكشە كۇتىمدى قاجەت ەدى. ال «باقىتتى وتباسى» ورتالىعى بارىنە ۇلگەرۋىم ءۇشىن ماعان ىڭعايلى جۇمىس ۋاقىتىن بەلگىلەپ بەردى»، - دەدى الەۋمەتتىك جۇمىستار بويىنشا كەڭەسشى ايدانا تاجىبايەۆا.