الماتىداعى №1 بالالار ءۇيىنىڭ تاربيەلەنۋشىلەرى قونايەۆ قالاسىنداعى عيماراتقا كوشىرىلمەيتىن بولدى. بۇل تۋرالى بالا قۇقىقتارى جونىندەگى ۋاكىل دينارا زاكييەۆا مالىمدەدى، دەپ حابارلايدى aqshamnews.kz.
الەۋمەتتىك جەلىدە بالالار ءۇيىنىڭ تاعدىرىنا قاتىستى ءتۇرلى اقپارات تارالعان ەدى. وقيعادان كەيىن دينارا زاكييەۆا №1 بالالار ءۇيىنىڭ تاربيەلەنۋشىلەرى مەن الماتى وبلىسىنىڭ اكىمى مارات سۇلتانعازييەۆپەن كەزدەسكەن.
باعاناشىل بالالار ۇيىندە تۇراتىن بالالار سوندا قالادى. نۇسىپبايەۆ اتىنداعى مەكتەپ-ينتەرناتىنىڭ بالالارىنا جاڭا عيمارات بەرىلەدى. بۇعان دەيىن ول جەردە ءومىر ءسۇرۋ قيىن، بالالارعا جاعداي جاسالماعانىن جازعان ەدىم. جاڭا عيماراتتىڭ ءبىر بولىگى ورتالىق عىلىم اكادەمياسى بولادى، وندا وبلىستىڭ بارلىق اۋداندارىنان بالالار قابىلدانادى، – دەپ جازدى دينارا زاكييەۆا