الماتى قالاسى بويىنشا قاج دەپارتامەنتىنىڭ №11 مەكەمەسىندە جازاسىن وتەۋشى جاسوسپىرىمدەر ءۇشىن «كىتاپ وقۋعا قۇشتارلىق!» اتتى شەكتەۋسىز وقۋ جوباسى اياسىندا ەرەكشە ءىس-شارا ۇيىمداستىرىلدى، دەپ حابارلايدى aqshamnews.kz.
Polisia.kzء-تىڭ حابارلاۋىنشا، بۇل رۋحاني شاراعا الماتى قالاسىنىڭ جامبىل اتىنداعى قالالىق جاسوسپىرىمدەر كىتاپحاناسىنىڭ وقىرماندارعا قىزمەت كورسەتۋ ءبولىمىنىڭ مەڭگەرۋشىسى جۇماحان نۇلىحان مەن شاراينا قۇماروۆا ءادىل قازىلىق ەتتى. سونىمەن قاتار مەكەمەدەگى جالپى ءبىلىم بەرەتىن مەكتەپتىڭ ءتىل ماماندارى ا. الييەۆا مەن ە. بۋتەنكو دا بەلسەنە قاتىستى. ءىس-شارادا ون ءتورت جازاسىن وتەۋگى ءجاسوسپىرىم وزدەرى وقىعان كوركەم شىعارمالاردى تانىستىرىپ، ولاردىڭ مازمۇنىن، تاربيەلىك ءمانىن، ۇلگى الارلىق تۇستارىن شەبەر جەتكىزدى.
جىرلاردى ناقىشىنا كەلتىرىپ مانەرلەپ وقۋ، پروزالىق تۋىندىلاردى اسەرلى بايانداۋ ارقىلى ولاردىڭ كىتاپ وقۋعا دەگەن قىزىعۋشىلىقتارى مەن شىنايى قۇشتارلىقتارى انىق بايقالدى. وقۋشىلاردىڭ جۇرەگىنەن ورىن تاپقان شىعارمالار قاتارىندا ۇلى ابايدىڭ ولەڭدەرى، بەيىمبەت مايلين، بەردىبەك سوقپاقبايەۆ، اسقار سۇلەيمەنوۆ سەكىلدى قازاق ادەبيەتىنىڭ كورنەكتى تۇلعالارىنىڭ تۋىندىلارى، اگاتا كريستيدىڭ دەتەكتيۆتەرى، ورىس كلاسسيكتەرىنىڭ شىعارمالارى، سونداي-اق قازىرگى زامانعى ادەبيەت وكىلدەرىنىڭ ەڭبەكتەرى دە بار.
جاستاردىڭ بوس ۋاقىتىن پايدالى وتكىزىپ، كوركەم ادەبيەتكە بەت بۇرۋى لايىقتى باعالاندى. بەلسەندى قاتىسۋشىلار مەكەمە باسشىلىعى اتىنان العىس حاتتارمەن جانە سىي-سياپاتتارمەن ماراپاتتالدى. ءىس-شارا سوڭىندا مەكەمە باستىعى المات سۇلەيمەنوۆ قوناقتارعا العىس ايتىپ، جاسوسپىرىمدەردى كوركەم ادەبيەت ارقىلى بىلىمگە، رۋحاني دامۋ مەن ءتىل بايلىعىن ارتتىرۋعا، ادەبي مۇرالاردى دارىپتەپ، ناسيحاتتاۋعا شاقىردى.
– بۇل جوبا – جاس ۇرپاقتىڭ سانالى بولاشاعىنا باعىتتالعان ماڭىزدى قادام، – دەدى ول.
ءىس-شارا بارىسىنداعى ءاربىر ءسوز، ءاربىر وقىلعان شىعارما جاسوسپىرىمدەردىڭ جان-دۇنيەسىنە ءۇمىت ساۋلەسىن ۇيالاتقانداي بولدى.