الماتىداعى «اۋەزوۆ ءۇيى» قايتا اشىلدى

الماتىداعى «اۋەزوۆ ءۇيى» قايتا جاڭارتۋدان كەيىن بۇگىن سالتاناتتى تۇردە اشىلدى. مۇراجايدا زاڭعار جازۋشىنىڭ ءومىرى مەن شىعارماشىلىعىنان سىر شەرتەر دۇنيەلەر زامان تالابىنا ساي جابدىقتالعان. مۋزەيدە عىلىمي قوردان بولەك، اۋەزوۆتىڭ كيىمدەرى، تۇتىنعان زاتىنان تۇراتىن 200-گە جۋىق جادىگەر قويىلعان، -دەپ حابارلايدى Almaty-akshamy.kz. Almaty.tv-گە سىلتەمە جاساپ. 

قايتا جاڭارتۋدان وتكەن مۇراجاي 7 بولىمنەن تۇرادى. ءار بولىمدە مۇحتار اۋەزوۆتىڭ بالالىق شاعىنان باستاپ، ءومىرىنىڭ سان-قيلى كەزەڭىن قامتيتىن ەكسپوزيسيالار قويىلعان. قايتا وڭدەۋدەن وتكەن ۇستەلى، ورىندىعى مەن قالامدارى جانە ادەبي شىعارمالارىنىڭ قولجازبا نۇسقاسى كوپشىلىككە قايتا ۇسىنىلدى.

«بىزدە اباي جۋرنالىنىڭ ەلەكتروندى تۇردە سكانەرلەرگەن نۇسقاسى بار. كەلگەن قوناعىمىز ونى قازاق، ورىس، اعىلشىن تىلىندە كورە الادى. بۇل – 1918 جىلى جۇسىپبەك ايماۋىتوۆپەن بىرگە شىعارعان جۋرنالى. سول جونىندە ناقتىراق دەرەك الامىز دەسە، بارلىق قۇجاتتار وسىلاي جىلجىتىپ كورۋگە بولادى»، – دەدى «اۋەزوۆ ءۇيى» مادەني-عىلىمي ورتالىعىنىڭ باس قور ساقتاۋشىسى سالتانات مۇقاتايەۆا.

اۋەزوۆ ۇيىندەگى قۇندى جادىگەردىڭ ءبىرى – ۇستەل. مۇندا ەڭلىك-كەبەك پەسساسى، قازاقتىڭ تۇڭعىش مۋزىكالىق كومەدياسى ايمان-شولپان، قالقامان-مامىر سىندى ادەبي شىعارمالار دۇنيەگە كەلگەن. سونداي-اق اباي جولىنىڭ 2 تومىن دا وسى ۇستەل باسىندا وتىرىپ جازعان. مۇحات اۋەزوۆ ول شىعارماسى ءۇشىن 1949 جىلى مەملەكەتتىك سىيلىقتى يەلەندى.

سالتاناتتى ءىس-شاراعا اۋەزوۆتىڭ بالالارى مەن نەمەرەلەرى، شاكىرتتەرى مەن ادەبيەت الەمىن زەرتتەۋشى عالىمدار كەلدى. ولاردىڭ اراسىندا عۇمىرىن ابايتانۋ سالاسىنا ارناعان، مۇحتار اۋەزوۆتىڭ مەكتەبىن كورگەن، ارنايى شەبەرلىگىنەن وتكەن مەكەمتاس مىرزاحمەتوۆ تە بار.

«ابايتانۋ» دەگەن قيىن تاقىرىپ بەردى. وتە قيىن. اۋەزوۆ سول كەزدە «شىمشىقتان قورىققان تارى ەكپەيدى» دەمەكشى قورىقساڭ الما، قورىقپاساڭ كىرىس» دەدى. «ابايتانۋ» تاريحىن 3 جىلدا جازىپ شىقتىم. سول ارقىلى مۇحاڭمەن، ديمەكەڭمەن جاقسى ەستە قالارلىق ساتتەر ءوتتى»، – دەدى فيلولوگيا عىلىمدارىنىڭ دوكتورى، پروفەسسور مەكەمتاس مىرزاحمەتوۆ.

الماتىداعى ەكسپوزيسيالىق كورمە مۇحتار ومارحان ۇلىنىڭ 100 جىلدىعىنا وراي 1997 جىلى سالىنعان بولاتىن. اراعا 25 جىل سالىپ، مۇراجاي كۇردەلى جوندەۋدەن ءوتتى. مۋزەيدە اۋەزوۆ تۋرالى دەرەكتى فيلم تاماشالاۋعا ارنالعان كينو-زال دا بار. ارنايى كەلگەن قوناقتار بەينەتاسپادان جازۋشىنىڭ داۋىسىن ەستىپ، وسيەتىن ءوز اۋزىنان تىڭداي الادى. ۇيىمداستىرۋشىلار اۋەزوۆ مۇراسىنا دەگەن قىزىعۋشىلىقتى ودان ءارى نىعايتا تۇسەتىنىنە سەنىمدى.