الماتى اكىمى دارحان ساتىبالدى جۇمىس ساپارى بارىسىندا ناۋرىزباي اۋدانىنداعى «الما سيتي-5» تۇرعىن ءۇي كەشەنىنىڭ تۇرعىندارىمەن كەزدەستى. اڭگىمە بارىسىندا ولار ينجەنەرلىك جانە الەۋمەتتىك ينفراقۇرىلىمعا قاتىستى ماسەلەلەردى كوتەردى.
2020-2021 جىلدارى «نۇرلى جەر» مەملەكەتتىك باعدارلاماسى اياسىندا بۇل كەشەندە 127 كوپقاباتتى ءۇي سالىندى. الايدا ەلەكتر جەلىلەرى ءالى كۇنگە دەيىن قىزمەت كورسەتۋشى ۇيىمداردىڭ بالانسىنا بەرىلمەگەن. سونىڭ سالدارىنان 2025 جىلدىڭ باسىنان بەرى 30-دان استام اپات بولىپ، ءجيى اقاۋلار ورىن العان. بۇل اپاتتار سۋ سورعى قوندىرعىلارىنىڭ جۇمىسىنا دا كەدەرگى كەلتىرىپ وتىر.
«مەن ەنەرگەتيكا جانە سۋمەن جابدىقتاۋ باسقارمالارىنا، سونداي-اق قۇرىلىس باسقارماسىنا جەلىلەردى ءۇش جىل مەرزىمگە تولىققاندى قىزمەت كورسەتۋ ءۇشىن «الاتاۋ جارىق كومپانياسى» اق بالانسىنا بەرۋدى تاپسىردىم. بۇل ۇدەرىستى جەدەلدەتۋ قاجەت»، – دەدى الماتى اكىمى. بۇل ماسەلەنى بيىلعى قىركۇيەكتە شەشۋ جوسپارلانىپ وتىر. سونىمەن قاتار ءاربىر ەسەپتەگىش قۇرالىن تەكسەرۋدى قوسا العاندا، كەشەندى تەكسەرۋ جۇرگىزىلەدى.
تۇرعىندار الەۋمەتتىك ينفراقۇرىلىمنىڭ دا جايىن ايتتى. بيىل بەس جاڭا مەكتەپ پەن ءۇش بالاباقشا اشۋ كوزدەلگەن. جاقىن كۇندەرى №202 بالاباقشا پايدالانۋعا بەرىلەدى. بۇعان قوسا، ناۋرىزباي اۋدانىندا ەرەكشە قاجەتتىلىگى بار بالالارعا ارنالعان تۇزەتۋ ورتالىعى جانە باسقا دا الەۋمەتتىك نىساندار سالۋ جوسپاردا بار.
كەزدەسۋ بارىسىندا پوليسيانىڭ تىرەك پۋنكتىن ورناتۋ جانە ۋچاسكەلىك ينسپەكتورلار سانىن ارتتىرۋ جونىندە دە ۇسىنىس ايتىلدى. اكىم پوليسيا دەپارتامەنتىنە كەشەن اۋماعىندا تىرەك پۋنكتىن اشۋ مۇمكىندىگىن قاراستىرۋدى تاپسىردى.