قالا اكىمدىگىنىڭ مالىمەتىنشە، 1938 جىلى سالىنعان بۇرىنعى عيماراتقا جۇرگىزىلگەن تەحنيكالىق تەكسەرۋ ناتيجەسىندە تىرەك قۇرىلىمدارى مەن ينجەنەرلىك جەلىلەرىنىڭ 100 پايىز توزعانى انىقتالعان. ءورت قاۋىپسىزدىگى، جەلدەتۋ، گيدرووقشاۋلاۋ جۇيەلەرى قازىرگى زامان تالاپتارىنا ساي كەلمەگەن، سونداي-اق ناۋقاستاردى تاسىمالداۋعا ارنالعان جەدەل ساتى بولماعان.
جەر تەلىمى تەكتونيكالىق جارىلىم ايماعىندا ورنالاسقانىنا قاراماستان، عيماراتتا بىردە-بىر رەت سەيسميكالىق كۇشەيتۋ جۇمىستارى جۇرگىزىلمەگەن. عيماراتتىڭ سەيسميكالىق نورمالار تالاپتارىنا سايكەس كەلمەيتىنى جونىندە ءقازقسعزي-دىڭ ءتيىستى قورىتىندىسى بار.
قۇرىلىمدىق توزۋدان بولەك، نىسان مەديسينالىق كومەك كورسەتۋ ستاندارتتارىنا دا ساي بولماعان. اتاپ ايتقاندا، قابىلداۋ بولىمىندە شۇعىل وتا جاسايتىن زال بولماعان، پاسيەنتتەردى triage (سۇرىپتاۋ) جۇيەسىمەن قابىلداۋعا جاعداي جاسالماعان، وپەراسيالىق بلوك پەن رەانيماسيادا ينفەكسيالىق باقىلاۋعا ارنالعان ارنايى ءۇي-جايلار قاراستىرىلماعان.
"عيماراتتىڭ ىرگەتاسىن كۇشەيتۋ مۇمكىن بولماعاندىقتان، ال كۇردەلى جوندەۋ مەن ونى ۇستاۋ ەكونوميكالىق تۇرعىدان ءتيىمسىز دەپ تانىلعاندىقتان، 1938 جىلعى عيماراتتى ءسۇرىپ، ونىڭ ورنىنا جاڭاسىن سالۋ تۋرالى شەشىم قابىلداندى"، – دەلىنگەن حابارلامادا.
جوباعا سايكەس، جالپى اۋماعى 10 مىڭ شارشى مەتردەن اساتىن ءۇش قاباتتى جاڭا عيمارات سالىنادى. جاڭا پەرزەنتحانا 155 ورىنعا ەسەپتەلگەن. زاماناۋي پالاتالار انا مەن بالاعا جايلى جاعداي جاساپ، ەنەرگيا ۇنەمدەيتىن تەحنولوگيانى ەنگىزۋ پايدالانۋ شىعىندارىن ازايتۋعا مۇمكىندىك بەرەدى.
قابىلداۋ بولىمىندە شۇعىل وتا جاسايتىن بولمە قاراستىرىلعان، بۇل كەزەك كۇتتىرمەيتىن كومەكتى كىدىرىسسىز كورسەتۋگە جول اشادى. وپەراسيالىق زالداردىڭ جالپى سانى ەكىدەن تورتكە دەيىن ارتادى. سونداي-اق، قابىلداۋ ءبولىمىنىڭ قۋاتى تاۋلىىگە 25-تەن 38 وتىنىشكە دەيىن ۇلعايتىلادى.
جاڭا كورپۋس پايدالانۋعا بەرىلگەننەن كەيىن كورسەتىلەتىن مەديسينالىق قىزمەت سانى جىلىنا 11 مىڭنان 14 مىڭعا دەيىن ءوسىپ، بوسانۋ سانى 5 مىڭنان 9 مىڭعا دەيىن ارتادى دەپ جوسپارلانىپ وتىر. جاڭا عيمارات اكۋشەرلىك، پەريناتالدىق كومەك پەن جاڭا تۋعان نارەستەلەرگە كۇتىم جاساۋ سالاسىندا يننوۆاسيا مەن وزىق مەديسينالىق تەحنولوگيانى، دالەلدى مەديسينالىق تاسىلدەردى ەنگىزۋگە مۇمكىندىك بەرەدى.
"قۇرىلىس جۇمىستارىن كەلەسى جىلدىڭ ناۋرىز ايىندا اياقتاۋ جوسپارلانعان. وسى كەزەڭدە پەرزەنتحانا جۇمىسىن توقتاتپايدى — بارلىق بولىمشە ۋاقىتشا سەيفۋللين داڭعىلىنداعى "ا" بلوگىنا ورنالاستىرىلادى".
الماتى اكىمدىگى