بەلسەندى بولۋ ءارى جارقىن اسەر الۋ: الماتىدا زەينەتكەرلەرگە ارنالعان ەكسكۋرسيالار باستالدى، دەپ حابارلايدى Almaty-akshamy.kz
الماتىدا 26 قازاننان 8 قاراشاعا دەيىن زەينەتكەرلەر ءۇشىن الماتى قالاسى مەن الماتى وبلىسىندا ورنالاسقان نىساندار بويىنشا ەكسكۋرسيالار وتكىزىلەدى. ءىس-شارالاردى الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى الماتى قالاسىنىڭ تۋريزم باسقارماسىمەن بىرلەسىپ «بەلسەندى ۇزاق ءومىر» جول كارتاسى اياسىندا ىسكە اسىرادى. ولاردىڭ ماقساتى-ەگدە جاستاعى ادامداردى بەلسەندى ومىرگە تارتۋ، ولاردىڭ الەۋەتىن اشۋ، ءومىر ءسۇرۋ ساپاسىن جاقسارتۋ، عۇمىرلارىنىڭ ۇزاق بولۋىنا ىقپال ەت،الەۋمەتتىك جانە پسيحولوگيالىق جاعدايلارىن جاقسارتۋ.
«بۇل ءىس-شارالاردىڭ اعا بۋىن وكىلدەرىنە قولداۋ كورسەتۋدە ماڭىزى زور. يگى شارالاردىڭ ارقاسىندا ەگدە جاندار ءوزارا ارالاسادى، تاجىريبە الماسادى، اڭگىمە- دۇكەن قۇرادى. ولاردىڭ بەلسەندىلىگىن ارتتىرىپ، قوعامنىڭ ماڭىزدى مۇشەلەرى بولۋلارىنا ىقپال ەتەدى»، - دەپ اتاپ ءوتتى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ.
26 قازاندا شارىن كانونى بويىنشا تۋر وتتى-ەكسكۋرسياعا 100 ادام شىعارىلدى. ساياباق قىزمەتكەرلەرى ولارعا ەڭ ادەمى جەرلەردى كورسەتتى، سونىمەن قاتار كانون تاريحىن ەگجەي-تەگجەيلى ايتىپ بەردى. قاتىسۋشىلارعا ەكسكۋرسيا وتە ۇنادى. ولار كانوننىڭ كورنەكتى جەرلەرىنىڭ بىرىنە - قۇلىپتار القابىنا باردى، ول بەلگىسىز الىپتار جاساعانداي مۇناراعا ۇقسايتىن جارتاس شوگىندىلەرى.
ايتا كەتەرلىگى، كەز-كەلگەن جاستاعى تۋريستەر ءۇشىن ۇلتتىق ساياباقتىڭ اۋماعىندا جاعىمدى دەمالىس ءۇشىن بارلىق جاعدايلار جاسالعان. ۇزاق سەرۋەندەۋدەن كەيىن تۋر قاتىسۋشىلارىن ءدامدى تۇسكى اس كۇتىپ تۇردى.
زەينەتكەر باقىت وماروۆانىڭ ايتۋىنشا، كانونعا ەكسكۋرسيا ول ءۇشىن ەلەۋلى وقيعا بولدى جانە ول باسقا ەكسكۋرسيالارعا قۋانا قاتىسادى.
«ادەمى كورىنىستەن ءلاززات الۋ، جاعىمدى ەموسيالار الۋ، قارىم — قاتىناس جاساۋ - بۇل شىنىمەن دە ۇلكەن راحات جانە ەڭ جاعىمدى اسەر قالدىرادى. ۇيىمداستىرۋشىلارعا وسى تاماشا مۇمكىندىك ءۇشىن العىس ايتامىن»، - دەدى ول.
«باقىتتىڭ ءوزى جاقسى دەمالۋدان دا قۇرالادى»، - دەپ تولىقتىردى زەينەتكەر رايسا مامبەتوۆا. ول ۇيىمداستىرۋشىلارعا شىن جۇرەكتەن العىسىن ءبىلدىردى.
الداعى كۇندەرى ەسىك كولى مەن الماتى قالاسى بويىنشا تۋرلار جوسپارلانعان، وندا زەينەتكەرلەر جاقسى دەمالىپ، بارلىق كورىكتى جەرلەرمەن تانىسا الادى. الماتى قالاسىنىڭ تاريح مۇراجايىنا، ۆوزنەسەن كافەدرالدى سوبورىنا، ىقىلاس اتىنداعى مۋزىكالىق اسپاپتار مۇراجايىنا، «شىمبۇلاق» تاۋ شاڭعىسى كۋرورتىنا جانە قالانىڭ باسقا دا ماڭىزدى ورىندارىنا بارۋ كۇتىلۋدە.