الەۋمەتتىك جەلىدە ەگدە جاستاعى ايەلدى سوققىعا جىققان ەر ادام تۋرالى ۆيدەو تاراعان بولاتىن. الماتى قالاسى الاتاۋ اۋدانىنىڭ پروكۋراتۋراسى كۇدىكتى ۇستالىپ، پوليسيا بولىمشەسىنە جەتكىزىلگەنىن ءمالىم ەتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«الاتاۋ اۋدانى پوليسيا باسقارماسىنىڭ قىزمەتكەرلەرى ارنايى شارالار جۇرگىزۋ بارىسىندا كۇدىكتىنىڭ تۇلعاسىن انىقتاپ، ونى پوليسيا باسقارماسىنا جەتكىزدى. قازىرگى تاڭدا اتالعان تۇلعاعا قاتىستى ارنايى تەرگەۋ ارەكەتتەرى جۇرگىزىلۋدە. ونىڭ ارەكەتىنە ءتيىستى باعا بەرىلىپ، زاڭدى پروسەسسۋالدى شەشىم قابىلدانادى»، - دەپ حابارلادى الاتاۋ اۋدانىنىڭ پروكۋراتۋراسىنان.
ۆەدومستۆو مالىمەتىنشە، 74 جاستاعى ايەلدى ءوزىنىڭ 50 جاستاعى ۇلى ۇرعان.
«الاتاۋ اۋدانىنىڭ پوليسيا باسقارماسى 1972 جىلى تۋعان س.ا.ۆ.-عا قاتىستى ءوزىنىڭ 1948 جىلى تۋعان س.ن.ي. اناسىنا اسا قاتىگەزدىكپەن، بۇزاقىلىق نيەتپەن، قاساقانا دەنساۋلىعىنا اۋىرلىعى ورتاشا زيان كەلتىرۋ دەرەگى بويىنشا تەرگەۋ جۇرگىزىپ جاتىر. قازىرگى تاڭدا جابىرلەنۋشىگە قاتىستى سوت-مەديسينالىق ساراپتاما تاعايىندالدى. قىلمىستى تەرگەۋ بارىسى پروكۋروردىڭ جەكە باقىلاۋىندا»، - دەدى پروكۋراتۋرادا.
بۇعان دەيىن حابارلاعانىمىزداي، سىرتقى بەينەباقىلاۋ كامەراسىنا جازىلعان ۆيدەودا الدىمەن ەكى ايەل اراسىندا جانجال شىققانىن، كەيىن ەر ادام ولاردىڭ ءبىرىن جەرگە جىعىپ، ۇرا باستاعانىن كورۋگە بولادى.