زاڭسىز ەڭبەك ەتىپ جۇرگەن ميگرانتتار انىقتالدى
الماتى قالالىق پوليسيا دەپارتامەنتىنىڭ مالىمەتىنە سايكەس، قازاقستان رەسپۋبليكاسىنىڭ كوشى-قون زاڭناماسىن بۇزعانى ءۇشىن سوت شەشىمىمەن ەلدەن تاجىكستاننىڭ 37 ازاماتى قۋىلدى، دەپ حابارلايدى Almaty-akshamy.kz
«قازاقستانداعى تاجىكستان رەسپۋبليكاسىنىڭ كونسۋلدىعىنىڭ كومەگىمەن الماتى پوليسيا دەپارتامەنتى قۇقىق بۇزۋشى شەتەلدىكتەردى وزبەكستانمەن مەملەكەتتىك شەكاراعا دەيىن جەتكىزۋدى ۇيىمداستىردى. بۇل ءۇشىن كوپ ورىندىعى بار اۆتوبۋس ءبولىندى. كونسۋلدىق كەيبىر ادامدارعا وتانىنا ورالۋ تۋرالى كۋالىك بەرگەن بولاتىن. بۇل ءبىزدىڭ ءبىرىنشى تاجىريبەمىز ەمەس، وسىدان ءۇش اي بۇرىن ديپلوماتيالىق قىزمەتتەرمەن بىرلەسىپ، وزبەكستان رەسپۋبليكاسىنىڭ 20-دان استام ازاماتىن وتانىنا جەتكىزۋ ۇيىمداستىرىلعان»، – دەدى الماتى قالالىق پد كوشى-قون قىزمەتى باسقارماسىنىڭ باستىعى اسحات بۋتۋنچينوۆ.
الماتىدا وسى كۇندەرى زاڭسىز كوشى-قون ارنالارىن، شەتەلدىكتەردى زاڭسىز جۇمىسقا ورنالاستىرۋ فاكتىلەرىن انىقتاۋ ماقساتىندا «كەلىمسەك» جەدەل الدىن الۋ شاراسى ءوتىپ جاتىر.
«ءىس-شارانىڭ توعىز كۇنىندە كوشى-قون زاڭناماسىن بۇزعانى ءۇشىن 1 146 شەتەلدىك اكىمشىلىك جاۋاپقا تارتىلدى. 47 شەتەل ازاماتى ەلدەن شىعارىلدى. شەتەلدىكتەردىڭ قازاقستاندا بولۋىنىڭ زاڭدىلىعىن قامتاماسىز ەتۋ شارالارىن قولدانباعانى ءۇشىن 355 تۇلعا جازالاندى. شەتەلدىك جۇمىس كۇشىن تارتۋ ەرەجەلەرىن بۇزعانى ءۇشىن 28 جۇمىس بەرۋشىگە ايىپپۇل سالىندى»، – دەپ قورىتىندىلادى اسحات بۋتۋنچينوۆ.