بۇل شارا WorldSkills International حالىقارالىق ستاندارتتارى نەگىزىندە ۇيىمداستىرىلدى.
چەمپيوناتتىڭ ماقساتى – جۇمىسشى ماماندىقتاردىڭ بەدەلىن ارتتىرۋ جانە تەحنيكالىق-كاسىپتىك ءبىلىم الىپ جاتقان جاستاردىڭ كاسىبي داعدىسىن دامىتۋ.
سايىسقا قالاداعى كوللەدجدەردە وقيتىن ستۋدەنتتەر قاتىسىپ، كاسىبي شەبەرلىگىن ءتۇرلى باعىتتار بويىنشا كورسەتەدى.
ال باعالاۋ ءۇشىن 250-دەن استام كاسىبي ساراپشى مەن جۇمىس بەرۋشى تارتىلدى. ولار قاتىسۋشىلاردىڭ تاپسىرمالاردى ورىنداۋ ساپاسى مەن كاسىبي ستاندارتتارعا سايكەستىگىن باعالايدى.
جەڭىمپازدار 2025 جىلدىڭ قاراشاسىندا استانادا وتەتىن WorldSkills Kazakhstan-2025 رەسپۋبليكالىق چەمپيوناتىنا قاتىسۋ قۇقىعىن الادى. سونداي-اق، قىركۇيەكتە دانيانىڭ حەرنينگ قالاسىندا وتەتىن EuroSkills Herning 2025 حالىقارالىق چەمپيوناتىندا قازاقستاننىڭ نامىسىن قورعاۋعا جولداما الادى. WorldSkills Almaty-2025 – جاس مامانداردىڭ قابىلەتىن شىڭداپ، تاجىريبە جينايتىن جانە جاڭا مۇمكىندىكتەر اشاتىن بىرەگەي الاڭ.
ايتا كەتۋ كەرەك، بيىلعى چەمپيوناتتىڭ ەرەكشەلىكتەرىنىڭ ءبىرى – الماتى قالاسىنىڭ 9 جانە 11-سىنىپ وقۋشىلارى ارنايى شاقىرىلدى. وقۋشىلار كاسىپتىك باعىت-باعدار الىپ، بولاشاق ماماندىعىن دۇرىس تاڭداۋعا مۇمكىندىك الادى.
اشىلۋ سالتاناتىنا الماتى قالاسى اكىمىنىڭ ورىنباسارى اسەم ءنۇسىپوۆا جانە الماتى قالاسى ءماسليحاتىنىڭ ءتوراعاسى مەيىرجان وتىنشييەۆ قاتىسىپ، جاس ماماندارعا ساتتىلىك تىلەدى.
«مەملەكەت باسشىسى قاسىم-جومارت توقايەۆ 2025 جىلدى – جۇمىسشى ماماندىقتار جىلى دەپ جاريالادى. بۇل باستاما ەلىمىزدىڭ ەكونوميكاسىنىڭ نەگىزىن قۇرايتىن تەحنيكالىق جانە كاسىپتىك باعىتتاعى ماماندىقتارعا كورسەتىلگەن زور قولداۋ مەن جوعارى قۇرمەتتىڭ ايعاعى بولىپ وتىر. وسىعان وراي، ءبىز WorldSkills Almaty-2025 ايماقتىق چەمپيوناتىن جاڭا فورماتتا ۇيىمداستىرىپ وتىرمىز. بيىل چەمپيونات اۋقىمى كەڭەيىپ، قاتىسۋشىلار سانى ارتتى. چەمپيوناتقا 53 قۇزىرەت، ياعني ماماندىق باعىتى بويىنشا 350 جاس مامان قاتىسۋدا. ەرتەڭ چەمپيونات رەسمي تۇردە باستالادى. ال بىرنەشە كۇننەن كەيىن ءبىز ەلىمىزدىڭ ەڭ ءىرى مەگاپوليسى – الماتى قالاسىنداعى ۇزدىك جاس مامانداردىڭ ەسىمدەرىن انىقتايمىز. جەڭىمپاز اتانعان الماتىلىقتار استانادا وتەتىن WorldSkills Kazakhstan رەسپۋبليكالىق چەمپيوناتىندا ب ا ق سىنايدى. ال ەڭ ۇزدىكتەرگە حالىقارالىق دەڭگەيدە قازاقستاننىڭ نامىسىن قورعاۋ مۇمكىندىگى بەرىلەدى. چەمپيونات جىل سايىن زاماناۋي جانە سۇرانىسقا يە مامانداردى دايارلاۋدىڭ قوزعاۋشى كۇشىنە اينالىپ كەلەدى. شاھارىمىزدىڭ چەمپيوناتىندا جاڭا جۇلدىزداردىڭ جاناتىنىنا جانە ولاردىڭ جارقىن جەڭىستەرىنىڭ كۋاسى بولاتىنىمىزعا كامىل سەنەمىن»، – دەدى الماتى قالاسى ءماسليحاتىنىڭ ءتوراعاسى مەيىرجان وتىنشييەۆ.