بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا كونكۋرستى ۇيىمداستىرۋشىلار - الماتى قالاسى بويىنشا قازاقستاننىڭ ىسكەر ايەلدەر قاۋىمداستىعىنىڭ وكىلدەرى حابارلادى.
قايىرىمدىلىق باستامالار بايقاۋىنا وتىنىمدەر 2023 جىلدىڭ 15 جەلتوقسانىنا دەيىن قابىلدانادى، دەپ حابارلايدى Almaty-akshamy.kz.
ۇيىمداستىرۋشىلاردىڭ ايتۋىنشا، جوبا ەل دامۋىنا ۇلكەن ۇلەس قوسىپ جاتقان جۇزدەگەن باتىل، وزەكتى ماسەلەلەرگە بەي-جاي قارامايتىن ادامداردى، مەسەناتتاردى انىقتايدى. وتكەن جىلى بارلىعى 969 ءوتىنىم جينالدى، ال الماتى قالاسىنان - 41 ۇمىتكەر، ولاردىڭ اراسىندا لاۋرەاتتار بار.
"التىنشى رەت ۇيىمداستىرىلىپ وتىرعان "مەيىرىمدىلىك كەرۋەنى" رەسپۋبليكالىق بايقاۋىنىڭ باستالعانى تۋرالى قۋانا حابارلايمىز. بايقاۋ يگى ىستەر جاسايتىن ادامداردى انىقتاۋعا، حالىقتىڭ ازاماتتىق باستامالارىن جانداندىرۋعا جانە مەيىرىمدىلىك، كەڭپەيىلدىلىك پەن گۋمانيزم سياقتى ادامگەرشىلىك قۇندىلىقتاردى نىعايتۋعا باعىتتالعان"، - دەدى الماتى قالاسى بويىنشا قازاقستاننىڭ ىسكەر ايەلدەر قاۋىمداستىعىنىڭ مۇشەسى فاريدا جىلقىبايەۆا.
ماسەلەن، وتكەن جىلى "مەيىرىم جولىندا" نوميناسياسى بويىنشا 10 جىلدان استام ۋاقىت بويى جۇمىس ىستەپ كەلە جاتقان جانە ونكولوگيالىق اۋرۋلارى بار بالالارعا، جەتىم بالالارعا، بالا كەزىنەن مۇگەدەكتەرگە، كەدەيلەرگە، كوپبالالى وتباسىلارعا، سونداي-اق كومەككە مۇقتاج جاندارعا تۇراقتى وتەۋسىز نەگىزدە كومەك كورسەتىپ كەلە جاتقان "ءادىل" قايىرىمدىلىق قورى جەڭىمپاز اتاندى.
"تۋعان جەر" نوميناسياسىندا قۇزىرەتتىلىكتى دامىتۋ ورتالىعىن قۇرعانى ءۇشىن ITeachMe قوعامدىق قورى ءۇشىنشى ورىنعا يە بولدى. "باتىل جۇرەك" نوميناسياسىندا ايەلدى ورتتەن قۇتقارعان باۋىرجان اۋەلبەكوۆ 3 ورىن الدى.
قاڭتار ايىنداعى قايعىلى وقيعالار كەزىندە ەرەكشە ەرلىك كورسەتكەن №7 قكا حيرۋرگ-دارىگەرى عازيز قۇنانباي ۇلى تولەپبەرگەنوۆ "باتىس جۇرەك" نوميناسياسىنىڭ قۇرمەتتى ديپلومىمەن ماراپاتتالدى.
بايقاۋدى نۇرسۇلتان نازاربايەۆ قورى، "كتك"تەلەارناسىنىڭ قولداۋىمەن قازاقستان ىسكەر ايەلدەرى قاۋىمداستىعى جۇزەگە اسىرادى.
بايقاۋعا الەۋمەتتىك، قوعامدىق ماسەلەلەردى شەشۋدە ءوز ۇلەستەرىن قوسىپ جانە ءوز ىس-ارەكەتتەرىمەن باسقالاردى ىنتالاندىرىپ جۇرگەن جەكە جانە زاڭدى تۇلعالار قاتىسا الادى.
ۇيىمداستىرۋشىلار تۇسىندىرگەندەي، كونكۋرسقا كاسىپكەرلىك سۋبەكتىلەرى، سونداي-اق قايىرىمدىلىق قىزمەتى مەملەكەتتىك قولداۋمەن (مەملەكەتتىك گرانت، مەملەكەتتىك تاپسىرىس جانە ت.ب.) بايلانىستى تۇلعالار قاتىسا المايدى.
كونكۋرس لاۋرەاتتارى كەلەسى نوميناسيالار بويىنشا انىقتالادى:
- "اسار" - قايىرىمدىلىق قىزمەتى حالىقتىق ادەت-عۇرىپتار مەن داستۇرلەردى ساقتاۋعا باعىتتالعان نوميناسيا؛
- "تۋعان جەر" - تۋعان ولكەگە ءبىلىم بەرۋ، ەكولوگيا جانە اباتتاندىرۋ، مادەني نىسانداردى قالپىنا كەلتىرۋ جانە كومەككورسەتۋ، ت. ب. سالالاردا قايىرىمدىلىق كورسەتەتىن لاۋرەاتقا تاپسىرىلادى ؛
- "باتىل جۇرەك" - باتىرلىق پەن جانقيارلىق ءۇشىن. بۇل نوميناسيا شۇعىل قىزمەت قىزمەتكەرلەرى (تج، ءىىم، جەدەل جاردەم جانە باسقالار)اراسىنان سۋىرىلىپ شىققان جەڭىمپازعا بەرىلۋى مۇمكىن.
- "مەيىرىم جولىندا" - بەلگىلى ءبىر ۋاقىت ارالىعىندا قايتارىمسىز قىزمەت كورسەتەتىندەر ءۇشىن بەرىلەدى؛
- "قايىرىمدىلىق تاريحى" - نوميناسيا جۋرناليستكە جانە / نەمەسە
شىعارماشىلىق ۇجىمعا باق-تا قايىرىمدىلىقتى، الەۋمەتتىك پروبلەمالاردى كورسەتۋدە ۇزدىك دەپ تانىلعانى ءۇشىن بەرىلەدى.
كونكۋرسقا قاتىسۋ تۋرالى تولىق اقپاراتتى www.fnn.kz جانە www.businesswomen.kz سايتتارىنان بىلۋگە بولادى، انىقتاما تەلەفوندارى: + 7771 785 7569 النۋرا نۇربەك قىزى الماتى ق. بويىنشا كونكۋرستىڭ ۇيلەستىرۋشىسى، + 7701 555 1392 ايناش جۇماباي قىزى الماتى ق. ادج اتقارۋشى ديرەكتورى.