ىقىلاس اتىنداعى حالىق مۋزىكالىق اسپاپتار مۋزەيىندە Bere banda اتتى ستۋدەنتتىك ۇجىمنىڭ كونسەرتى ءوتتى، دەپ حابارلايدى aqshamnews.kz
كەش قوناقتارى ءداستۇرلى ۆەنگر مۋزىكاسىن تاماشالادى. ۆەنگريانىڭ الماتىداعى باس كونسۋلى سابولچ كاروي سوكە مىرزا كونسەرتتە ءسوز سويلەپ:
«قازاقستان مەن ۆەنگريانى كوپتەگەن نارسە بايلانىستىرادى. ءبىزدىڭ باستى ماقساتىمىز – مادەني داستۇرلەردى ساقتاۋ جانە ەكى ەل اراسىنداعى دوستىقتى نىعايتۋ. مۋزىكانتتارىمىزدى جىلى قابىلداپ، جۇرەكتەرىڭىزدە ساقتاڭىزدار»، – دەدى.
انسامبل مۇشەلەرى ۆولتا، ليۋتنيا، ەلەكتروندىق كلارنەت، سكريپكا، فلەيتا جانە اككوردەون اسپاپتارىمەن كامەرالىق كومپوزيسيالار ورىندادى. ولاردىڭ ونەرىن تىڭداۋعا ءار جاستاعى ادامدار، ونىڭ ىشىندە قۇرمانعازى اتىنداعى قازاق ۇلتتىق كونسەرۆاتورياسى مەن جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرى مەن وقىتۋشىلارى كەلدى.
كەش بارىسىندا مۋزىكانتتار تەك كونسەرت بەرىپ قانا قويماي، ەسكى مۋزىكالىق اسپاپتاردى قالپىنا كەلتىرۋ جايلى ايتىپ، الماتىلىق ارىپتەستەرىمەن تاجىريبە الماستى. سونىمەن قاتار، جينالعاندار «قازاقستاننىڭ كوشپەندىلەرى: وتكەن جانە قازىرگى» كورمەسىن ۇيىمداستىرۋ ماسەلەلەرىن تالقىلادى. بۇل كورمەنى ۆەنگريادا وتكىزۋ جوسپارلانعان، ونىڭ ماقساتى — ەلدەر اراسىنداعى تاريحي بايلانىستاردى ودان ءارى نىعايتۋ.
قازىرگى ۆەنگريا اۋماعىندا XIII عاسىردىڭ ءبىرىنشى جارتىسىندا تورعاي دالاسىنان كوشىپ بارعان قىپشاق تايپالارىنىڭ ۇرپاقتارى تۇرادى. سوندىقتان قازاقستاندىق جانە ۆەنگر عالىمدارى ورتاق تاريحي تامىرلاردى زەرتتەۋگە ەرەكشە قىزىعۋشىلىق تانىتىپ وتىر. بۇل بايلانىستاردىڭ زاماناۋي كۋاگەرى رەتىندە بۋداپەشتتەگى اباي ەسكەرتكىشى مەن استانا كوشەسىنىڭ اشىلۋى ايتۋعا تۇرارلىق.