V دۇنيەجۇزىلىك كوشپەندىلەر ويىندارىنىڭ باستالۋىنا 11 كۇن قالدى.
بيىلعى ويىندارعا الماتىدان ەكى سپورتشى قاتىسادى. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە بەلگىلى بولدى، دەپ حابارلايدى aqshamnews.kz.
ۇلتتىق جانە ات سپورتى كلۋبىنىڭ جەتەكشىسى نۇرلان وسپانوۆتىڭ ايتۋىنشا، ءار وڭىردەن ويىندارعا قاتىساتىن «ەلشىلەر» مەن ءبىر «باتىر» سپورتشى تاعايىندالادى. ولاردىڭ مىندەتى – ويىنداردىڭ ماڭىزدىلىعى مەن ەرەكشەلىكتەرىن ناسيحاتتاۋ، سونداي-اق كەزدەسۋلەر مەن دوڭگەلەك ۇستەلدەردى ۇيىمداستىرۋ.
«ق ر تۋريزم جانە سپورت مينيسترلىگىنىڭ جانىنان 5 دۇنيەجۇزىلىك كوشپەندىلەر ويىندارىنا ارنالعان ديرەكسيا قۇرىلدى، ول تولىعىمەن ۇيىمداستىرۋ ماسەلەلەرىمەن اينالىسادى. ءبىزدىڭ مىندەتىمىز – الماتىدا كوشپەندىلەر ويىندارىن ناسيحاتتاۋ جانە ءىس-شارالار بارىسىندا استاناداعى ويىندارعا قاتىسۋ. بۇل تۋريستەرگە الماتى قالاسىن، ونىڭ تاريحىن، سپورتىن جانە ۇلتتىق قولونەرىن تانىستىرۋ ءۇشىن جاسالادى»، – دەپ ءبولىستى نۇرلان وسپانوۆ.
الماتىدان ەكى سپورتشى ەل نامىسىن «قازاق كۇرەسى» بويىنشا قورعايدى. ولارعا ۇلكەن ءۇمىت ارتىلىپ وتىر، اسىرەسە حالىقارالىق دارەجەدەگى سپورت شەبەرى ەراسىل جاناتايەۆقا ارتىلعان سەنىم مول.
قازىرگى ۋاقىتتا استانادا وقۋ-جاتتىعۋ جيىندارىنىڭ ءۇشىنشى كەزەڭى ءوتىپ جاتىر. سپورتشىلاردى ىرىكتەۋ قازاقستان چەمپيوناتتارى مەن كۋبوكتارىنىڭ جۇلدەگەرلەرى اراسىنان جۇرگىزىلدى.
دايىندىق بارىسىندا 52 حالىقارالىق جانە رەسپۋبليكالىق وقۋ-جاتتىعۋ جيىندارى مەن 40 جارىس (23 حالىقارالىق جانە 17 رەسپۋبليكالىق) وتكىزىلدى.
الماتى قالاسىنىڭ كوورديناتورلارىنىڭ ءبىرى، ەڭبەك سىڭىرگەن سپورت قايراتكەرى ايتالاپ قۇرعامبايەۆ سپورتشىلاردىڭ جارىستارعا جاقسى دايىندىقپەن كەلەتىنىنە سەنىم ءبىلدىردى.
«بۇل ءىس-شاراعا الەمنىڭ 89 ەلىنەن قاتىسۋشىلار كەلەدى دەپ كۇتىلۋدە. بۇل ەلگە ءوزىنىڭ ۇلتتىق تاريحىن، مادەنيەتىن جانە سپورتىن كورسەتۋگە ۇلكەن مۇمكىندىك. ەگەر ءبىز وسى مۇمكىندىكتى پايدالانا الساق، تۋريستىك باعىتتاعى جۇمىسىمىزدى جانداندىرامىز. قازانات يپپودرومىندا 10 گەكتار الاڭدا ەتنواۋىل مادەني باعدارلاماسى ۇيىمداستىرىلادى. ەلىمىزدىڭ ءاربىر ءوڭىرى ءۇش كيىز ءۇي تىگىپ، وزدەرىنىڭ تاريحىن، مادەنيەتىن جانە قولونەرىن كورسەتەدى»، – دەپ تولىقتىردى ول.
بريفينگكە رەسپۋبليكالىق «قۇسبەگىلىك» فەدەراسياسىنىڭ ۆيسە-پرەزيدەنتى، «قىران» فەدەراسياسىنىڭ اتقارۋشى ديرەكتورى باعدات مۇپتەكە قىزى دا قاتىستى. ول بۇل ويىندار – قازاق حالقىنىڭ بىرەگەي ۇلتتىق بولمىسىن الەمگە پاش ەتۋ مۇمكىندىگى ەكەنىن اتاپ ءوتتى.
«الداعى ءىس-شارا كوشپەندىلەر ويىندارىنىڭ الەمدەگى دەڭگەيىن عانا ەمەس، قازاقستاننىڭ مادەني جانە سپورتتىق قۇندىلىقتارىن دا كورسەتەدى. ءبىزدىڭ ۇلتتىق سپورت ءتۇرىمىز – «قۇسبەگىلىك» الدىڭعى ءتورت ويىننىڭ باعدارلاماسىنا كىرمەگەن ەدى، ءبىراق بيىل ول ەنگىزىلىپ وتىر، ءبىز بۇعان وتە قۋانىشتىمىز. بۇركىت – قازاق رۋحى مەن توزىمدىلىگىنىڭ سيمۆولى، ول سونداي-اق ءبىزدىڭ ۇلتتىق تۋىمىزدا بەينەلەنگەن»، – دەپ ءبولىستى باعدات مۇپتەكە قىزى.
V دۇنيەجۇزىلىك كوشپەندىلەر ويىندارى – ەلدەر اراسىنداعى مادەني جانە سپورتتىق بايلانىستاردى نىعايتاتىن، سونداي-اق ۇلتتىق مۇرانى ناسيحاتتاۋعا ىقپال ەتەتىن ماڭىزدى ءىس-شارا.