الماتىدا ۇشەم دۇنيەگە كەلدى: دارىگەرلەر كۇردەلى وتا جاسادى

بالالار كەسار تىلىگى ارقىلى دۇنيەگە كەلدى.

پەريناتولوگيا جانە بالالار كارديوحيرۋرگياسى ورتالىعىندا سالماعى 1990، 1940 جانە 2200 گرامم ءۇش ۇل بالا دۇنيەگە كەلدى. دەپ حابارلايدى Almaty-akshamy.kz قازاقپاراتقا سىلتەمە جاساپ.

س.اسفەندياروۆ اتىنداعى قازۇمۋ باسپا ءسوز قىزمەتىنىڭ مالىمەتىنشە، بالالار كەسار تىلىگى ارقىلى دۇنيەگە كەلدى. وپەراسيا كۇردەلى بولدى. وتانى پروفەسسور، مەديسينا عىلىمدارىنىڭ دوكتورى، №2 اكۋشەرلىك جانە گينەكولوگيا كافەدراسىنىڭ مەڭگەرۋشىسى، 30 جىلدان استام تاجىريبەسى بار دارىگەر ساۋلە يسەنوۆا جاسادى.

«ۇلدار جۇكتىلىكتىڭ 34 اپتاسىندا دۇنيەگە كەلدى. بالالاردىڭ ءارقايسىسى ءوز ۇرىق قابىعىمەن تۋدى. جاتىر قۋىسىنان شىعارىلعاننان كەيىن عانا ۇرىق قابىعى اشىلىپ، نارەستەلەر دۇنيەگە كەلدى. شالا تۋعان ءسابيدى الۋدىڭ بۇل ءادىسى ءارتۇرلى مۇشەلەردە قان كەتۋمەن بايلانىستى كوپتەگەن اسقىنۋلاردىڭ الدىن الادى. وپەراسيا ءبىر ساعاتتان استام ۋاقىتقا سوزىلدى جانە ءساتتى ءوتتى. ءقازىر انا ءوزىن جاقسى سەزىنەدى»، - دەدى قازۇمۋ پروفەسسورى ساۋلە يسەنوۆا.

ايتا كەتسەك، جاقىندا ساۋلە شايكەن قىزى وسىنداي بوساندىرۋدى قابىلداعان. ۇشەم ەكۇ جولىمەن دۇنيەگە كەلدى. وتا ماۋسىم ايىنىڭ سوڭىندا جاسالدى. اناسى مەن بالالارى 2 اپتادان كەيىن ورتالىقتان شىعارىلدى.