الماتى قالاسىنداعى جالپى جولدىڭ ۇزىندىعى 3097 شاقىرىم
الداعى 2 جىلدا الماتى قالاسىندا 3 جولايىرىق تولىق پايدالانۋعا بەرىلەدى. سونداي-اق قالاداعى 5 اۋداندا 209 شاقىرىم جاڭا جول سالىنادى. بۇل شاھارداعى جول قوزعالىسىن رەتتەپ، ەكولوگيالىق احۋالدىڭ جاقسارۋىنا سەپ بولماق، دەپ حابارلايدى «حابار 24».
الماتى ءۇشىن ءتۇيىنى شەشىلمەگەن ماسەلەنىڭ ءبىرى - جولداعى كەپتەلىس. سوڭعى مالىمەتتەرگە سۇيەنسەك قالادا 500 مىڭنان استام كولىك تىركەلگەن. بۇعان كۇن سايىن وزگە وبلىستاردان كەلەتىن ماشينالاردى قوسىڭىز. بۇل تۇيىتكىلدى شەشۋ ءۇشىن سوڭعى 15 جىلدا 18 جولايىرىق سالىندى. مۇنىمەن قوسا 11 بەكەتتىك مەترو ىستەپ تۇر. ءبىراق شاھاردا ءالى دە جول قوزعالىسى قيىن.
«حالىق سانى دا كوبەيىپ جاتىر. رازۆيازكا بولماعان جىلدارمەن قازىرگى جىلداردى سالىستىرساق، ءبارىبىر كەپتەلىس بولىپ جاتىر. سول سەبەپتى حالىق سانى كوبەيگەن سوڭ جول ماسەلەسىن دە تۇراقتى دامىتۋ كەرەك»،- دەيدى قالا تۇرعىنى عازيز ەرەجەپ.
قالا اكىمدىگىنىڭ تاپسىرىسىمەن ءقازىر سالىنىپ جاتقان 3 جولايىرىق بولاشاقتا كولىك قوزعالىسىن جىلدامداتادى دەگەن بولجام بار. ونىڭ ءبىرى بۇقتىرما كوشەسىمەن قۇلجا تاس جولىنىڭ قيىلىسىندا سالىنۋدا. بۇل قۇرىلىسقا 11،5 ملرد تەڭگە بولىنگەن. بۇگىنگى تاڭدا جولايرىقتىڭ 90 پايىز جۇمىسى اياقتالىپ، كوپىرلەرى پايدالانۋعا بەرىلدى. تەك جەراستى وتكەلدەرىنىڭ قۇرىلىسى قالعان.
«ورتادا 1400 مم ماگيسترالدىق ترۋبالار جاتقاندىقتان قوسىپ ۇلگەرمەدىك. سوندىقتان قالدى. قازىرگى تاڭدا وسى وبەكت بويىنشا ينجەنەرلىك توراپتار سالىنۋدا، سۋ تاراتۋ قۇبىرلارىنىڭ 80 پايىزى اياقتالدى»، - دەيدى مەردىگەر كومپانيا ينجەنەرى ماقسات بايشارايەۆ.
الماتى قالاسىنداعى جالپى جولدىڭ ۇزىندىعى 3097 شاقىرىم. ولاردىڭ 86 پروسەنتىندە اسفالت جابىندىسى بار. اكىمدىك وكىلدەرى 2023 جىلى بۇل كورسەتكىشتى 95 پايىزعا جەتكىزەمىز دەيدى. اتاپ ايتقاندا بيىل شاڭىراق-1، المەرەك، قايرات، اقجار، العاباس شاعىن اۋداندارىندا جاڭا جولدار سالىنىپ بىتەدى. سونداي-اق كولىك قاتىناسى ءۇشىن ماڭىزدى رىسقۇلوۆ داڭعىلى بولاشاقتا قالا شەكاراسىنا دەيىن ۇزارتىلادى.
«سايىن كوشەسىن رىسقۇلوۆ داڭعىلىنان موڭكە بي كوشەسىنە دەيىن ۇزارتۋ. ونىڭ ۇزىندىعى 3 كم بولادى. بۇگىنگى كۇنگە جۇمىستار 55 پروسەنتە دەيىن دايىن. وسى جىلى ءبىز تولە بي كوشەسىن ياسساۋي كوشەسىنەن قالانىڭ شەكاراسىنا دەيىن جۇمىستاردى باستادىق. قۇرىلىس جۇمىستارىن»،- دەيدى الماتى قالاسى جول ينفراقۇرىلىمىن دامىتۋ ءبولىمىنىڭ جەتەكشىسى ايدوس جەلدىكبايەۆ.
سەيفۋللين مەن جانسۇگىروۆ جانە سايىن مەن موڭكە بي كوشەلەرىنىڭ قيىلىسىنداعى جولايىرىقتاردىڭ قۇرىلىسىنا دا قوماقتى قاراجات بولىنگەن. ال ۇلكەن الماتى اينالما جولى ىسكە قوسىلسا ءجۇرىسىمىز جىلدامداپ، تىنىسىمىز كەڭەيەدى دەگەن ءۇمىت بار.