باتارەيا دورميا كارزەڭكەسىنىڭ كومەگىمەن الىندى
الماتىلىق دارىگەرلەر ءۇش جاسار بالا جۇتىپ قويعان باتارەيانى وتاسىز الدى، دەپ حابارلايدى Almaty-akshamy.kz ءتىلشىسى الماتى قالالىق قوعامدىق دەنساۋلىق ساقتاۋ باسقارماسىنا سىلتەمە جاساپ.
ۆەدومستۆونىڭ مالىمەتىنشە، بالانىڭ اتا-اناسى الماتى قالالىق بالالار جەدەل مەديسينالىق كومەك كورسەتۋ ورتالىعىنا جۇگىنگەن. ءسابيدىڭ اناسى بالاسىنىڭ قولىنداعى شىناشاقتاي باتارەيانى كەنەت اۋزىنا سالىپ، جۇتىپ قويعانىن ايتقان.
«فگدس زەرتتەۋى بوگدە زاتتىڭ بارىن كورسەتتى - اسقازاننىڭ تومەنگى جاعىندا شىناشاقتاي كىشكەنە باتارەيكا تابىلدى. بالالار جەدەل جاردەم ءبولىمىنىڭ دارىگەرلەرى بالانىڭ دەنەسىنەن ءقاۋىپتى زاتتى شىعارۋدى دەرەۋ قولعا الدى. سەبەبى، باتارەيانى جۇتقان سوڭ، قابىنۋ پروسەسى بىرنەشە ساعات ىشىندە باستالادى. بۇل اسقازاننىڭ نەمەسە وڭەشتىڭ شىرىشتى قابىعىنىڭ كۇيىپ كەتۋىنە، ءتىپتى وسى ورگانداردىڭ پەرفوراسياسىنا اكەلۋى ابدەن مۇمكىن»، - دەپ حابارلادى قالالىق قوعامدىق دەنساۋلىق ساقتاۋ باسقارماسىندا.
«باتارەيانى شىعارۋ كەزىندە ول قايتا-قايتا وڭەشتىڭ جوعارعى ۇشتەن ءبىر بولىگىنەن، ءدال جوعارعى فيزيولوگيالىق تارىلۋ ايماعىندا سىرعىپ كەتە بەردى. سودان ءبىز باتارەيانى جوعارعى ۇشتەن ءبىر بولىككە جەتكىزىپ، ونىڭ ارتىنا فولەي كاتەتەرىن قويۋدى شەشتىك. باتارەيا دورميا كارزەڭكەسىنىڭ (ەندوسكوپيالىق پروسەدۋرالار كەزىندە قۋىستاعى تاستار مەن ءتۇرلى بوگدە دەنەلەردى الىپ تاستاۋعا ارنالعان قۇرال) كومەگىمەن الىندى. سودان كەيىن فولەي كاتەتەرى ۇرلەنىپ، ەندوسكوپتىق تۇتىك جانە بوگدە دەنەنى ۇستاپ العان دورميا سەبەتىمەن بىرگە اسقازان مەن وڭەشتەن ءساتتى شىعارىلدى»، - دەدى الماتى بالالار شۇعىل مەديسينالىق كومەك كورسەتۋ ورتالىعىنىڭ حيرۋرگ-ەندوسكوپيست دارىگەرى مۇرات دۇيسەبايەۆ.
وسىعان وراي، حيرۋرگيالىق وتا جاساۋدىڭ قاجەتى بولماعان.
«جىل باسىنان بەرى بالالار شۇعىل مەديسينالىق كومەك كورسەتۋ ورتالىعىنا اسقازان-ىشەك جولدارىندا بوتەن زات بار 125 بالا، تىنىس جولدارىندا بوتەن زات بار 32 بالا تۇسكەن. كوبىنەسە، بالالار تيىن، باتارەيا، كىشكەنتاي ويىنشىقتاردى جۇتادى. وكپەدەن دارىگەرلەر نەگىزىنەن جەرجاڭعاق، تۇقىم، گرەك جاڭعاعى، قالام قاقپاعىن تابادى»،- دەپ حابارلادى ۆەدومستۆودا.
جوعارىدا اتالعان جاعدايعا بايلانىستى دارىگەرلەر اتا-انالاردان كىشكەنتاي بالالارىنا مۇقيات قاراۋدى، ولاردىڭ وينايتىن زاتتارىنا نازار اۋدارۋدى سۇرادى.