الماتىداعى بالالار كارديوحيرۋرگياسى جانە پەريناتولوگيا ورتالىعىندا قۇرساقتاعى ۇرىققا وتا ءساتتى جۇرگىزىلدى، بۇل تۋا ءبىتتى بولاتىن پاتولوگيانى تۇزەتۋگە سەپتىك ەتىپ، ءسابيدىڭ دۇنيەگە دەنى ساۋ بولىپ كەلۋ مۇمكىندىگىن ارتتىرادى.
ورتالىق دارىگەرلەرى مينسك رەسپۋبليكالىق عىلىمي-تاجىريبەلىك «انا مەن بالا» ورتالىعى فەتالدى مەديسينا بولىمشەسىنىڭ مەڭگەرۋشىسىمەن بىرگە الماتى قالاسى، الماتى جانە اقمولا وبلىستارىنان كەلگەن ءۇش جۇكتى ايەلگە وتا جاسادى، دەپ حابارلايدى aqshamnews.kz. Kaz.inform.kz-كە سىلتەمە جاساپ.
وتانى جاساۋ اياسىندا مىنا جۇمىستار اتقارىلدى:
- فەتو-فەتالدى ترانسفۋزيا سيندرومىنان (ففتس) اسقىناتىن كوپۇرىقتى جۇكتىلىك كەزىندەگى بالانىڭ جولداسى اناستوموزىنىڭ لازەرلى كواگۋلياسياسى. بۇل ءادىس ۇرىقتار اراسىنداعى تامىرلاردىڭ پاتولوگيالىق بىرىگۋىن جويۋعا سەپتىك ەتىپ، سونىڭ ارقاسىندا قاتتى اسقىنۋدىڭ الدىن الادى جانە ەگىزدەردىڭ ەكەۋىنىڭ دە ءومىرىن ساقتايدى.
- شارانا سۇيىقتىعى پاتولوگياسى بولعان جاعدايداعى امنيورەدۋكسيا جانە امنيوينفۋزيا. بۇل پروسەدۋرالار ۇرىقتىڭ دامۋىنا قولايلى جاعداي تۋعىزا جانە اسقىنۋ ءقاۋپىن ازايتا وتىرىپ شارانا سۇيىقتىعى مولشەرىن رەتتەۋگە كومەكتەسەدى.
- ۇرىقتىڭ بۇيرەك پاتولوگياسى بولعاندا قۋىقتى درەناجداۋ. بۇل وتا ۇرىقتىڭ نەسەپ ايداۋ جۇيەسىنىڭ دۇرىس جۇمىس ىستەۋىن قامتاماسىز ەتەدى جانە ونىڭ دۇرىس دامۋ مۇمكىندىگىن جاقسارتا وتىرىپ بۇيرەك جەتىسپەۋشىلىگى اسقىنۋىنىڭ الدىن الادى.
بارلىق وتالار ءساتتى جاسالدى، ناۋقاستاردىڭ جاعدايى ءدال قازىرگى ساتتە تۇراقتى. ولاردىڭ جۇكتىلىك كەزىندەگى دەنساۋلىعىن ماماندار ۇدايى باقىلاپ، ۇرىقتىڭ ودان ءارى دۇرىس دامۋىن قامتاماسىز ەتۋدە.
بۇل وتالاردى جاساۋ دەنساۋلىق ساقتاۋ مينيسترلىگىنىڭ «فەتالدى مەديسينا» جوباسىنىڭ ارقاسىندا مۇمكىن بولدى. ەندى قازاقستاندىق ايەلدەر الەمدىك ستاندارتتارعا ساي كەلەتىن جوعارى تەحنولوگيالى كومەكتى الىپ، دۇنيەگە دەنى ساۋ بالا اكەلۋ مۇمكىندىگىن ايتارلىقتاي ارتتىرادى. اتالعان جوبا وزىق مەديسينالىق تەحنولوگيالارعا قولجەتىمدىلىكتى ۇلعايتۋعا جانە قازاقستانداعى جۇكتى ايەلدەردىڭ بوسانار الدىنداعى كومەك دەڭگەيىن جاقسارتۋعا باعىتتالعان، ول بولاشاق انالارعا بالاسىنىڭ دەنساۋلىعىن ءومىرىنىڭ باسىنان باستاپ ساقتاۋىنا مۇمكىندىك بەرەدى.