كولىك ۇرلاعان جىگىت «جابىرلەنۋشىنىڭ ءوز ۇلى تاپسىرىس بەرگەنىن» ايتتى.
الماتىدا ۇرلانعان كولىك شىمكەنتتەن تابىلدى. كولىكتى ۇرلاعان ادام وسىلاي ىستەۋگە «تاپسىرىس تۇسكەنىن» ايتقان، - دەپ حابارلايدى اlmaty-akshamy.kz
الماتى پوليسيا دەپارتامەنتىنىڭ مالىمەتىنشە، «حيۋنداي» كولىگىنىڭ ۇرلانعانى تۋرالى يەسى پوليسياعا حابارلاعان. ايەلدىڭ ايتۋىنشا، بەلگىسىز بىرەۋ ونىڭ «دارابوز» شاعىناۋدانىنداعى ۇيلەردىڭ ءبىرىنىڭ اۋلاسىندا تۇرعان شەتەلدىك كولىگىن ۇرلاپ كەتكەن.
«وسى قىلمىستى اشۋ ماقساتىندا قالالىق كريمينالدىق پوليسيا جانە الاتاۋ اۋداندىق پوليسيا باسقارماسىنىڭ قىزمەتكەرلەرىنىڭ اراسىنان جەدەل تەرگەۋ توبى قۇرىلدى. ءبىز بەينەباقىلاۋ جۇيەلەرىنىڭ مۇمكىندىكتەرىن بەلسەندى تۇردە پايدالاندىق، ونىڭ كومەگىمەن، ەڭ الدىمەن، كولىكتى ۇرلاعان ادامنىڭ قوزعالۋ باعىتى مەن ءنومىردى اۋىستىرۋ دەرەگى انىقتالدى. كۇدىك تۋدىرماس ءۇشىن قاسكوي ۇرلانعان كولىككە ءدال سونداي «حيۋنداي» كولىگىنىڭ نومىرلەرىن ورناتقان. جەدەل ىزدەستىرۋ شارالارىنىڭ تىزبەگى جەدەل ۋاكىلدەردى شىمكەنت قالاسىنا الىپ كەلدى. كۇدىكتى سول جەردە ۇستالدى»، - دەدى الماتى پوليسيا دەپارتامەنتى باستىعىنىڭ ورىنباسارى، پوليسيا پولكوۆنيگى ديدار احانوۆ.
الايدا ۇستالعان ادام - 2000 جىلى تۋعان ك ەسىمدى ازامات، جابىرلەنۋشىنىڭ ۇلى شەتەلدىك كولىكتى ۇرلاۋعا «تاپسىرىس بەرگەنىن» ايتقان. ەكەۋى دوس بولىپ شىقتى.
«ءبىز ناقتى ءمان-جايدى، قىلمىستىڭ سەبەبىن انىقتايمىز. «تاپسىرىس تۋرالى» نۇسقا دا مۇقيات تەكسەرىلىپ جاتىر. جاستار ساقتاندىرۋ تولەمدەرىن الۋ ءۇشىن ۇرلىقتى جوسپارلاعان بولۋى دا مۇمكىن. سوتقا دەيىنگى تەرگەۋ جالعاسىپ جاتىر»، - دەدى پولكوۆنيك احانوۆ.