2024 جىلعى 27 قىركۇيەكتە قازاقستان رەسپۋبليكاسى مادەنيەت جانە اقپارات مينيسترلىگى مەن الماتى قالاسى اكىمدىگىنىڭ ۇيىمداستىرۋىمەن الماتى قالاسى ”دوستىق ۇيىندە” «ۇلتتىق ونوماستيكا: ىزدەنىس پەن تاجىريبە» اتتى رەسپۋبليكالىق سەمينار ءوتتى، دەپ حابارلايدى aqshamnews.kz.
ءىس-شارانىڭ ماقساتى – ەلىمىزدەگى ۇلتتىق ونوماستيكا سالاسىنداعى وزەكتى ماسەلەلەردى تالقىلاۋ جانە وسى باعىتتاعى وڭىرلەردىڭ قىزمەتىن جەتىلدىرۋ بويىنشا ۇسىنىستار ازىرلەۋ.
سەمينار جۇمىسىنا قازاقستان رەسپۋبليكاسى پارلامەنتى سەناتى مەن ءماجىلىسىنىڭ دەپۋتاتتارى، ءتيىستى ورتالىق مەملەكەتتىك جانە جەرگىلىكتى اتقارۋشى ورگانداردىڭ باسشىلارى، رەسپۋبليكالىق جانە الماتى قالاسى ونوماستيكا كوميسسيالارىنىڭ مۇشەلەرى قاتىستى. ءىس-شاراعا ەلىمىزدىڭ بارلىق وڭىرلەرىنەن ونوماستيكا ماسەلەسىنە جاۋاپتى لاۋازىمدى تۇلعالار كەلدى. سونىمەن قاتار سەمينارعا قوعامدىق ۇيىمداردىڭ جەتەكشىلەرى مەن زيالى قاۋىم وكىلدەرى دە شاقىرىلدى.
كۇن تارتىبىندە وزەكتەندىرىلگەن «تاريحي تۇلعالار»، «جەر-سۋ اتاۋلارى» جانە «ءداستۇرلى اتاۋلار» تىزىمدەرى جانە وزگەرىستەر مەن تولىقتىرۋلار ەنگىزىلگەن «قازاقستان رەسپۋبليكاسىنداعى ونوماستيكالىق جۇمىستاردى ۇيىمداستىرۋ جونىندەگى ادىستەمەلىك ۇسىنىمدار»، وڭىرلەردەگى ونوماستيكالىق احۋال، اتاۋلارى يدەولوگيالىق تۇرعىدان ەسكىرگەن ەلدى مەكەندەر مەن ولاردىڭ قۇرامداس بولىكتەرىن قايتا اتاۋ جونىندەگى 2022-2025 جىلدارعا ارنالعان جول كارتاسىنىڭ ىسكە اسىرىلۋى جانە تاعى دا باسقا ماڭىزدى ماسەلەلەر قارالدى.
سونىمەن بىرگە سەميناردا ەلدى مەكەندەردىڭ جانە ولاردىڭ قۇرامداس بولىكتەرىنىڭ بايىرعى تاريحي اتاۋلارىن عىلىمي زەرتتەۋ ماسەلەلەرى، سونداي-اق حالىق اراسىندا ونوماستيكا سالاسىنداعى مەملەكەتتىك ساياساتتى ءتۇسىندىرۋ جۇمىستارىن جۇرگىزۋگە باعىتتالعان ءىس-شارالار دا تالقىلاندى.