الماتىنىڭ ارباتىندا ۇيىمداستىرىلعان Nauryz Fashion Day ءىس-شاراسىندا ۇكىلى تاقيا، بۇرمەلى كويلەك، ويۋلى قامزول كيگەن كوركەم قىزدار، اق كيمەشەكتى اسىل اجەلەر جانە بورىك، شاپانى جاراسقان ەر ازاماتتار بۇگىنگى ۇلتتىق كيىم كۇنىنە قۇرمەت ءبىلدىرىپ، ءسان كورسەتىلىمىنە قاتىستى.
اربات كوشەسىنە توسەلگەن قىزىل كىلەم ۇستىمەن بەلگىلى ديزاينەر راۋشان انۋاربەكوۆانىڭ «الەمدى تاڭقالدىرعان قازاق اجەلەرى» جوباسىنىڭ قاتىسۋشىلارى، ياعني وتاندىق ءھام شەتەلدىك پوديۋمداردى ۇلتتىق كيىمدەرىمىزبەن باعىندىرىپ جۇرگەن ادەمى اجەلەر، «قازاقستان ارۋى» بايقاۋىنىڭ سۇلۋ فيناليستەرى سان-سالتاناتپەن ءجۇرىپ ءوتتى.
وسى ورايدا ايتا كەتەيىك، Nauryz Fashion Day تورىنە شىققان الماتىلىق اجەلەر بۇرىن ميلاندا ءسان اپتالىعىنىڭ اشىلۋىندا ونەر كورسەتكەن. ەندى نيۋ-يورك پەن پاريجدەگى Fashion Week-كە قاتىسۋدى جوسپارلاپ وتىر.
اشىق اسپان استىندا ۇلتتىق كيىممەن جارقىراپ شىققان قاتىسۋشىلاردىڭ قاتارىنا قالانىڭ ەتنو ستيلدە كيىنگەن تۇرعىندارى دا كەلىپ قوسىلدى. ءيا، قىزىل كىلەم ۇستىمەن ءجۇرىپ وتۋگە بۇگىن ۇلتتىق كيىم كۇنىنە قۇرمەتىم دەپ، قىدىرۋعا قازاقى كيىمىن ارنايى كيىپ شىققان قاراپايىم تۇرعىندارعا دا مۇمكىندىك بەرىلدى. ولار دا وزدەرىن ءبىر ءسات جۇلدىز سەزىنىپ، پوديۋمعا كوتەرىلىپ، قول بۇلعاپ، كوپتىڭ قوشامەتىنە بولەندى.
– «ەڭ ادەمى كيىم – ۇلتىڭنىڭ كيىمى» دەگەن. مەن بۇرىن «بۇرىمدى قىزدار»، «قىز سىنى»، «كەلىندەر سايىسى» سەكىلدى بايقاۋلاردى ءجيى ۇيىمداستىراتىنمىن. سول كۇندەر ەسكە ورالىپ تۇر. ول تۇستا قامزول، كاجەكەي دەگەندى تەك مەرەكەلەردە، الگىندەي بايقاۋلار ءۇشىن عانا كيەتىن ەدىك. ءقازىر جەكەلەگەن مەكەمەلەر قىزمەتكەرلەرىنىڭ رەسمي جۇمىس ورنىندا ناۋرىز بويى كيىپ وتىراتىنىن كورىپ ءجۇرمىن. كۇندەلىكتى ومىردە دە ۇلتتىق كيىم كيە باستاعانىمىزعا قۋانىشتىمىن، – دەيدى الماتىلىق زەينەتكەر-پەداگوگ، قوعام بەلسەندىسى رايسا قالدىبايەۆا.
قىزىل كىلەممەن ءسان-سالتاناتى كەلىسكەن «الاتاۋ» ءداستۇرلى ونەر تەاترىنىڭ جۇلدىزدارى، الماتى مۋزەيلەر بىرلەستىگىنىڭ قىزمەتكەرلەرى، الماتى مەملەكەتتىك قۋىرشاق تەاترىنىڭ ۇجىمى، الماتىلىق كىتاپحاناشىلار، الماتى حايۋاناتتار پاركىنىڭ ەڭبەككەرلەرى دە ءجۇرىپ ءوتتى. ءسويتىپ اسەم ارباتتىڭ اينالاسى بەكزات الەمگە بولەندى.
مادەني ءىس-شارا كەزىندە جينالعان قاۋىمعا ۇلتتىق كيىمدەر تۋرالى ۆيكتورينالىق سۇراقتار قويىلىپ، دۇرىس جاۋاپ بەرگەن جەڭىمپازدارعا الماتى مۋزەيىنە تەگىن بيلەت ۇسىنىلدى.