بيىل 15 000 جانۋاردى قامتۋ جوسپارلانىپ وتىر
الماتى قالاسىنداعى قاڭعىباس جانۋارلاردىڭ سانىن ىزگىلىكتى تۇردە رەتتەۋدىڭ 2021-2024 جىلدارعا ارنالعان باعدارلاماسىنىڭ شەڭبەرىندە الماتى قالاسىنىڭ اكىمدىگى ءۇي مىسىقتارى مەن يتتەرىن تەگىن چيپتەۋ باعدارلاماسىن قايتا ىسكە قوستى، دەپ حابارلايدى Almaty-akshamy.kz.
2022 جىلى الماتىدا 15 000 جانۋاردى قامتۋ جوسپارلانىپ وتىر. چيپتەۋ ءراسىمىن شارۋاشىلىق جۇرگىزۋ قۇقىعىنداعى «قالالىق ۆەتەريناريالىق قىزمەتى» كوممۋنالدىق مەملەكەتتىك كاسىپورنىنىڭ ۆەتەريناريالىق دارىگەرلەرى جۇرگىزەدى. جانۋارلاردىڭ يەلەرىنە قولايلى جاعداي جاساۋ ماقساتىندا ۆەتەريناريالىق قىزمەت جەكە سەكتوردىڭ ءار اۋلاسىن ارالاپ ءجۇرىپ قاراۋدى جانە اۋدان اكىمدىكتەرىمەن بىرلەسىپ چيپتەۋ بويىنشا كوشپەلى بريگادالاردىڭ جۇمىسىن ۇيىمداستىرۋدى جوسپارلاپ وتىر.
الماتى قالاسىنىڭ كەز كەلگەن تۇرعىنى ۆەتەريناريالىق قىزمەتتىڭ سall-ورتالىعىنا، تەلەفونى +7 708 595 6401، تاپسىرىس بەرە وتىرىپ، ءوزىنىڭ ءۇي جانۋارىن چيپتەۋدى جۇرگىزە الادى. يتتەر مەن مىسىقتاردى چيپتەۋدىڭ شەكتەۋلى جاسى: 2 ايعا تولعاندا.
چيپتەۋ – بۇل بىرەگەي 15 تاڭبالى ءنومىرى بار جانۋارلاردىڭ (يتتەردىڭ، مىسىقتاردىڭ) ميكروچيپىن يمپلانتاسيالاۋ بولىپ تابىلاتىن ەلەكتروندىق بىردەيلەندىرۋ. جانۋار جانە ونىڭ يەسى تۋرالى بارلىق اقپارات (بىرەگەي كود) «Pet Control» قالالىق دەرەكتەر قورىنا ەنگىزىلەدى. باعدارلاما قالاداعى جانۋارلاردىڭ ەسەبىن دۇرىس جۇرگىزۋ جانە جوعالىپ كەتكەن ءۇي جانۋارىنىڭ يەلەرىن جەدەل ىزدەستىرۋ ءۇشىن قاجەت.
بۇدان باسقا، چيپتەۋ ءراسىمى ءۇيسىز جانۋارلار سانىنىڭ وسۋىنە قارسى كۇرەس جۇرگىزۋدىڭ ەڭ ءتيىمدى شاراسى بولىپ تابىلادى. قاڭعىباس جانۋارلاردىڭ سانىنا اسەر ەتەتىن جايتتاردىڭ قاتارىنا يەلەرىنىڭ تاراپىنان بولاتىن جاۋاپسىزدىق، ولاردى باقىلاۋسىز ءوسىرۋ، ازىق بازاسىن ىزدەستىرۋ ماقساتىندا قاڭعىباس جانۋارلاردى الماتى وبلىسىنىڭ اۋماعىنان كوشىرۋ جاتادى.
قازاقستان رەسپۋبليكاسىنىڭ 2021 جىلعى 30 جەلتوقسانداعى «جانۋارلارعا جاۋاپكەرشىلىكپەن قاراۋ تۋرالى» زاڭىنا سايكەس، رەسپۋبليكادا ءۇي جانۋارلارىن چيپتەۋ 2023 جىلدىڭ 1 قىركۇيەگىنەن باستاپ، مىندەتتى بولىپ تابىلاتىنىن ەستەرىڭىزگە سالامىز.