الماتىدا تۇرمىستىق قاتتى قالدىقتاردان وتىن وندىرەتىن زاۋىت سالىنباق

قالادا قوقىستى بولەك جيناۋدى 10%-عا دەيىن جەتكىزۋ كوزدەلىپ وتىر.

الماتىدا 2030 جىلعا دەيىن تۇرمىستىق قاتتى قالدىقتاردان وتىن وندىرەتىن زاۋىت سالىنباق. بۇل تۋرالى ەربولات دوسايەۆ الماتى قالاسىن دامىتۋدىڭ 2025 جىلعا دەيىنگى جوسپارىن تالقىلاۋ بارىسىندا ءمالىم ەتتى، دەپ حابارلايدى Almaty-akshamy.kz.

«تۇرمىستىق قاتتى قالدىقتاردى جيناۋ جانە كادەگە جاراتۋدىڭ ءبىرىڭعاي جۇيەسىن قۇرۋ قاجەت. ونىڭ ماڭىزدى بولىكتەرى – 2 جاڭا قوقىس تيەۋ ستانسياسى، پوليگون، سونداي-اق وڭدەۋ زاۋىتى بولادى. 2030 جىلعا دەيىن قالدىقتاردان وتىن ءوندىرۋ زاۋىتىن سالۋ جوسپارلانىپ وتىر جانە قوقىستى بولەك جيناۋدى 10%-عا دەيىن جەتكىزەمىز»، - دەدى الماتى اكىمى.

ەربولات دوسايەۆتىڭ ايتۋىنشا، وسى ماسەلەگە بايلانىستى قالالىقتاردىڭ دا ۇسىنىسى نازارعا الىنادى.

«قالا تۇرعىندارى قوقىستى بولەك جيناۋ، تۇرمىستىق قاتتى قالدىقتاردى قايتا وڭدەۋ جانە ەكومادەنيەتتى دامىتۋ ماسەلەلەرىن ءجيى كوتەرىپ، ۇسىنىس بىلدىرەدى. بۇل ۇسىنىستاردىڭ بارلىعى ەگجەي-تەگجەيلى قاراستىرىلىپ، قالانى دامىتۋ جوسپارىن ودان ءارى ازىرلەۋ كەزىندە ەسكەرىلەتىن بولادى»، - دەدى ول.