جامبىل فيلارمونياسىندا وتكەن ان-اۋەن كەشىنە ق ر حالىق ءارتىسى ءجانيا اۋباكىروۆا، تۇركيا ءارتىسى لەليا بايراموعۇللارى جانە وزگە دە ونەر مايتالماندارى قاتىستى.
كونسەرت باستالماي تۇرىپ تۇركيانىڭ الماتىداعى باس كونسۋلى ەۆرەن ميۋدەرريسوگلۋ قۇتتىقتاۋ ءسوز سويلەدى.
"مەن وسىنداي تاماشا مۋزىكا مەكتەبىنە كەلگەنىمە وتە قۋانىشتىمىن. قازاقستان مەن تۇركيا اراسىنداعى تاريحي باۋىرلاستىق كوپتەگەن سالالاردا دامىپ جاتىر. بۇگىنگى كونسەرت ەكى ەل اراسىنداعى قارىم-قاتىناسقا وڭ اسەر ەتەدى دەپ سەنەمىن. تۇركىتىلدەس ەلدەردىڭ ىنتىماقتاستىعى كوپتەگەن سالالاردا، سونىڭ ىشىندە مادەنيەت پەن ونەردە دە قارقىندى دامىپ كەلەدى. انتاليا قالاسىنىڭ مەملەكەتتىك فيلارمونياسىنىڭ ءسوليستى، بەلگىلى فلەيتاشى لەليا بايراموعۇللارىن تىڭداۋعا كەلگەندەردىڭ بارلىعىنا العىس ايتامىز. ءجانيا اۋباكىروۆاعا قوناقجايلىلىعى ءۇشىن العىس ايتقىم كەلەدى"، – دەدى تۇركيانىڭ الماتىداعى باس كونسۋلى.
ال ءجانيا اۋباكىروۆا فلەيتا مەن پيانينو سىندى مۋزىكالىق اسپاپتاردان شاشۋ شاشىلعان ءان-ساز كەشى كۇزدە تاعى دا وتەتىنىن ايتتى.
"ەلشىلىك وكىلدەرىنە شىعارماشىلىق جوبامىزدى قولداعانى ءۇشىن العىس ايتامىن. شىعارماشىلىقتا ءبارى وتە قاراپايىم – مۋزىكانتتار كەزدەسىپ، كومپوزيسيالاردى بىرگە ورىنداۋعا كەلىسەدى. الايدا، حالىقارالىق شەكارانى ەڭسەرۋ ءۇشىن بىزگە مەملەكەت پەن ەلشىلىك وكىلدەرى، دەمەۋشىلەر كومەكتەسەدى. لەليا بايراموعۇللارى وتە ۇلكەن الەۋمەتتىك جۇمىس جۇرگىزىپ كەلەدى. ول الەمنىڭ تۇكپىر-تۇكپىرىندەگى تىڭدارمانداردى مۋزىكامەن تانىستىرۋ ءۇشىن الەمدەگى ءارتۇرلى حالىقتارمەن كەزدەسىپ، ءوز ونەرىن پاش ەتىپ ءجۇر. بۇل مۋزىكانى شىن سۇيەتىن جۇرەگى ۇلكەن مۋزىكانتتارعا ءتان قاسيەت. بۇگىنگى كونسەرت كۇزدە شۋبەرت پەن باسقا كومپوزيتورلاردىڭ باعدارلاماسىمەن قايتا وتكىزىلەتىنىن اتاپ وتكىم كەلەدى"، – دەدى ءجانيا اۋباكىروۆا.
