الماتى قالاسى اكىمى دارحان ساتىبالدىنىڭ توراعالىعىمەن تۋريزم ينفراقۇرىلىمىن دامىتۋ جانە ءقوناقۇي مەن گلەمپينگ قۇرىلىسىنا قاتىستى ينۆەستيسيالىق جوبالاردى جۇزەگە اسىرۋ ماسەلەلەرى بويىنشا جيىن ءوتتى. وعان سالالىق باسقارما باسشىلارى، ينۆەستورلار مەن بيزنەس وكىلدەرى قاتىستى.
اسىرەسە، ءقوناقۇي بيزنەسىنە قىزىعۋشىلىق تانىتىپ وتىرعان جەكە ينۆەستورلاردىڭ رولىنە ايرىقشا نازار اۋدارىلدى. بيىلعى جىلدىڭ قاڭتار-ماۋسىم ايلارىندا ورنالاستىرۋ سالاسىنا تارتىلعان جەكە ينۆەستيسيا كولەمى بىلتىرعى كورسەتكىشپەن سالىستىرعاندا ون ءۇش ەسەگە وسكەن. بۇل الماتى ءتۋريزمىنىڭ سەرپىندى دامىپ كەلە جاتقانىن ايعاقتايدى. قالالىق تۋريزم باسقارماسىنىڭ دەرەگىنشە، بۇگىندە مەگاپوليستە 70-تەن استام ينۆەستيسيالىق جوبا قولعا الىنعان. ولاردىڭ ءبىر بولىگى الداعى جىلدارى اياقتالسا، جالپى جوبالاردىڭ تولىق جۇزەگە اسۋ مەرزىمى 2030 جىلعا دەيىن جوسپارلانعان. بيىلدىڭ وزىندە بىرنەشە جاڭا ءقوناقۇي پايدالانۋعا بەرىلدى، جىل سوڭىنا دەيىن تاعى دا قوناقۇيلەر، تۋريستىك كەشەندەر مەن گلەمپينگتەر ىسكە قوسىلماق. 2025-2027 جىلدار ارالىعىندا قالاداعى ءقوناقۇي نومىرلەرىنىڭ قورى 1،5 ەسەگە ۇلعايىپ، 17 مىڭعا دەيىن جەتپەك.
دارحان ساتىبالدى ءتۋريزمدى دامىتۋدىڭ باستى باعىتتارىنىڭ ءبىرى زاماناۋي ءقوناقۇي ينفراقۇرىلىمىن قالىپتاستىرۋ جانە تۋريستەرگە قولايلى جاعداي جاساۋ ەكەنىن اتاپ ءوتتى. سونداي-اق، اكىم ەكولوگيالىق تالاپتاردى قاتاڭ ساقتاپ، تۋريستىك نىسانداردىڭ تابيعي ءارى مادەني مۇرامەن ۇيلەسىمدى سالىنۋى اسا ماڭىزدى ەكەنىن جەتكىزدى.
جيىن قورىتىندىسى بويىنشا قالا اكىمى ءتيىستى راسىمدەردى جەدەلدەتۋدى، ينۆەستيسيالىق جوبالاردى قاجەتتى ينجەنەرلىك ينفراقۇرىلىممەن قامتاماسىز ەتۋدى جانە جوبالاردى جۇزەگە اسىرۋدىڭ بارلىق كەزەڭىندە ينۆەستورلارعا قولداۋ كورسەتۋدى تاپسىردى.