جايلى دەمالۋدى قامتاماسىز ەتۋ ءۇشىن تانىمال مارشرۋتتاردا كەمپينگ ايماقتار قۇرىلادى، دەپ حابارلايدى Almaty-akshamy.kz
الماتىدا بيىلعى ءبىرىنشى جارتىجىلدىقتا شەتەلدىك تۋريستەر سانى 73%-عا ءوسىپ، 261 مىڭ ادامنان استى. بۇل تۋرالى الماتى قالاسىنىڭ تۋريزم باسقارماسى حابارلادى.
جىل سوڭىنا دەيىن الماتىعا كەلەتىن شەتەلدىك تۋريستەر سانى جارتى ميلليون ادامعا دەيىن جەتەدى دەپ بولجانىپ وتىر.
الماتىعا شەتەلدەن عانا ەمەس، ەلىمىزدىڭ وزگە وڭىرىنەن دە كەلەتىندەر كوپ. 2023 جىلدىڭ ءبىرىنشى جارتىجىلدىعىندا ىشكى تۋريستەر سانى 710 مىڭ ادامعا جەتىپ، 14%-عا ۇلعايدى. جالپى، تۋريستەردىڭ جالپى سانى 972 157 ادام، بۇل 25،5%-عا ءوستى.
تۋريستەردىڭ جايلى دەمالىسى ءۇشىن بيىل 3 كەمپينگ ايماقتى (اقبۇلاق، ۇاك جانە مىڭجىلقى) ورناتۋ جۇمىستارى اياقتالدى. شاتىرلى ورىندار، توبەسى جابىق بەسەدكالار، ۇستەل-ورىندىق، «التىباقان» ۇلتتىق ستيلىندەگى اتكەنشەكتەر ورناتىلدى.
سونىمەن قاتار، كىشى ۇلكەن الماتى، پروحودنوە، بۋتاكوۆكا شاتقالدارىن اباتتاندىرۋ جۇمىستارى اياقتالىپ، قارعالى شاتقالىندا جۇمىس قولعا الىنعان. مارشرۋت بويىندا ناۆيگاسيالىق كورسەتكىشتەر، اقپاراتتىق ستەندتەر، قالقاندار، تىرەكتەر، ءتۇرلى-تۇستى نۇسقاۋشى بەلگىلەر، بەسەدكالار (اينەكتەلگەندەردى قوسقاندا)، ورىندىقتار، دەمالۋعا ارنالعان پلاتفورمالار، كوپىرلەر مەن قورشاۋلار ورناتىلعان.